So‘nggi ikki yilini Toshkentning “Lokomotiv” klubida o‘tkazgan Temurxo‘ja Abduxoliqov Qatarning “As-Sayliya” klubi bilan shartnoma imzoladi. Bu haqda O‘FFning Telegram’dagi kanali xabar berdi.
Shartnoma 1,5 yilga mo‘ljallangan. Abduxoliqov Qatar Yulduzlar ligasida 11-o‘rinni egallab turgan jamoani mavsum so‘nggiga qadar yuqoriga ko‘tarishga harakat qiladi. Keyingi mavsum esa to‘liq shu jamoa safida to‘p tepadi.
Temurxo‘ja Abduxoliqov 2016-yilgi mavsumni O‘zbekiston Oliy ligasida to‘purar sifatida yakunlagandi. U raqiblar darvozasiga 29 ta uchrashuvda 22 ta gol urishga muvaffaq bo‘ldi. Bu holat O‘zbekiston milliy terma jamoasi bosh murabbiyi Samvel Babayanning e’tiborini tortib, o‘zi bir vaqtlar terma prinsiplariga mos kelmaydi deb hisoblaydigani Abduxoliqovni Amirlik yig‘iniga taklif qilgandi.
Qayd etish kerak, Temurxo‘janing bu natijalari “Lokomotiv” rahbariyatini qanoatlantirib, “temiryo‘lchilar” Abduxoliqov bilan yana bir yillik kelishuvga erishgandi. Shundan kelib chiqib, Qatar klubi “Lokomotiv” hisob raqamiga pul o‘tkazib berganmi yoki “Lokomotiv” futbolchiga omad tilab, uni “As-Sayliya” safiga shundoq qo‘yib yuborganmi — aniqlik kiritilmagan.
“Championat.asia” sayti ma’lumotiga ko‘ra, “As-Sayliya” klubi 1995-yilda tashkil topgan bo‘lib, uy uchrashuvlarini 25 ming muxlis uchun mo‘ljallangan “Ahmad ibn Ali” stadionida o‘tkazib keladi. Klubni ayni vaqtda tenislik Sami Trabelsi murabbiy sifatida boshqaradi. Uning qo‘l ostida fransiyalik Gregori Gomis, ruminiyalik Dragos Grigore, bahraynlik Favzi Aysh, kamerunlik Alo Efulu kabi legioner futbolchilar bor.
Temurxo‘ja Abduxoliqov “Lokomotiv”ga qadar Xorvatiyaning “Xayduk Split” klubi sharafini ikki mavsum himoya qilib qaytgandi. Professional futbolchilik karyerasini esa Toshkentning “Paxtakor” klubi safida boshlagan va uch mavsum shu jamoa sharafini himoya qilgan.
U Qatar Yulduzlar ligasida ayni vaqtda to‘p tepadigan uchinchi futbolchiga aylandi. Bu chempionatda Sardor Rashidov “Al-Jaish”, Sanjar Tursunov esa “Al-Haraytiyat” klubida to‘p suradi.
Izoh (0)