Сўнгги икки йилини Тошкентнинг «Локомотив» клубида ўтказган Темурхўжа Абдухолиқов Қатарнинг «Ас-Сайлия» клуби билан шартнома имзолади. Бу ҳақда ЎФФнинг Telegram’даги канали хабар берди.
Шартнома 1,5 йилга мўлжалланган. Абдухолиқов Қатар Юлдузлар лигасида 11-ўринни эгаллаб турган жамоани мавсум сўнггига қадар юқорига кўтаришга ҳаракат қилади. Кейинги мавсум эса тўлиқ шу жамоа сафида тўп тепади.
Темурхўжа Абдухолиқов 2016 йилги мавсумни Ўзбекистон Олий лигасида тўпурар сифатида якунлаганди. У рақиблар дарвозасига 29 та учрашувда 22 та гол уришга муваффақ бўлди. Бу ҳолат Ўзбекистон миллий терма жамоаси бош мураббийи Самвел Бабаяннинг эътиборини тортиб, ўзи бир вақтлар терма принципларига мос келмайди деб ҳисоблайдигани Абдухолиқовни Амирлик йиғинига таклиф қилганди.
Қайд этиш керак, Темурхўжанинг бу натижалари «Локомотив» раҳбариятини қаноатлантириб, «темирйўлчилар» Абдухолиқов билан яна бир йиллик келишувга эришганди. Шундан келиб чиқиб, Қатар клуби «Локомотив» ҳисоб рақамига пул ўтказиб берганми ёки «Локомотив» футболчига омад тилаб, уни «Ас-Сайлия» сафига шундоқ қўйиб юборганми — аниқлик киритилмаган.
«Championat.asia» сайти маълумотига кўра, «Ас-Сайлия» клуби 1995 йилда ташкил топган бўлиб, уй учрашувларини 25 минг мухлис учун мўлжалланган «Аҳмад ибн Али» стадионида ўтказиб келади. Клубни айни вақтда тенислик Сами Трабелси мураббий сифатида бошқаради. Унинг қўл остида франциялик Грегори Гомис, руминиялик Драгос Григоре, баҳрайнлик Фавзи Айш, камерунлик Ало Эфулу каби легионер футболчилар бор.
Темурхўжа Абдухолиқов «Локомотив»га қадар Хорватиянинг «Хайдук Сплит» клуби шарафини икки мавсум ҳимоя қилиб қайтганди. Профессионал футболчилик карьерасини эса Тошкентнинг «Пахтакор» клуби сафида бошлаган ва уч мавсум шу жамоа шарафини ҳимоя қилган.
У Қатар Юлдузлар лигасида айни вақтда тўп тепадиган учинчи футболчига айланди. Бу чемпионатда Сардор Рашидов «Ал-Жаиш», Санжар Турсунов эса «Ал-Ҳарайтият» клубида тўп суради.
Изоҳ (0)