2017-yilgi mavsumga tayyorgarlikni davom ettirayotgan O‘zbekistonning amaldagi chempioni va Kubogi sohibi “Lokomotiv” ikki nafar afrikalik legioner futbolchi bilan shartnoma imzoladi. Bu haqda “temiryo‘lchilar” matbuot xizmati xabar bermoqda.
Kot-d’Ivuar fuqarosi hisoblangan himoyachi Mohamed Kone va hujumchi Gnohore Krizo endilikda “Lokomotiv” sharafini himoya qiladi. Ikkala futbolchi tibbiy ko‘rikdan muvaffaqiyatli o‘tdi. Kelishuv muddati haqida ma’lumot berilmagan.
Afrikalik futbolchilar 2016-yilning dekabr oyi oxirlarida “temiryo‘lchilar” yig‘iniga kelib qo‘shilgandi. “Olmaliq”qa qarshi kechgan hamda “Lokomotiv”ning 3:1 hisobidagi g‘alabasi bilan yakunlangan o‘rtoqlik o‘yinida ikkala legioner maydonga tushgandi. Mohamed Kone himoya markazida ishonchli o‘yin ko‘rsatgan bo‘lsa, hujumchi Gnohore Krizo ikkita gol urishga muvaffaq bo‘lgandi.
Ma’lumot uchun, markaziy himoyachi Mohamed Kone 1993-yilning 12-dekabrida tug‘ilgan. 23 yoshli futbolchi 2015–2016-yilgi mavsumni Moldovaning “Olimpiya” klubi safida o‘tkazib, 25 ta uchrashuvda maydonga tushgan. Mavsumning qolgan qismida u Kiprning “Karmiotissa” klubi sharafini himoya qilib, 14 ta uchrashuvda ishtirok etgan.
19 yoshli hujumchi Gnohore Krizo esa 1997-yilning 20-iyunida tavallud. Afrikalik yosh hujumchi 2016-yilning birinchi davrasini Belarusning “Slutsk” klubida o‘tkazgan. Ikkinchi davrada esa Moldovaning “Saksan” jamoasi tarkibiga borib qo‘shilgan.
Avvalroq “Lokomotiv” klubi “Nasaf” himoyachisi Shuhrat Muhammadiyev va “Olmaliq” yarim himoyachisi Diyor Turopov bilan shartnoma tuzgandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)