2017 йилги мавсумга тайёргарликни давом эттираётган Ўзбекистоннинг амалдаги чемпиони ва Кубоги соҳиби «Локомотив» икки нафар африкалик легионер футболчи билан шартнома имзолади. Бу ҳақда «темирйўлчилар» матбуот хизмати хабар бермоқда.
Кот-дъИвуар фуқароси ҳисобланган ҳимоячи Моҳамед Коне ва ҳужумчи Гноҳоре Кризо эндиликда «Локомотив» шарафини ҳимоя қилади. Иккала футболчи тиббий кўрикдан муваффақиятли ўтди. Келишув муддати ҳақида маълумот берилмаган.
Африкалик футболчилар 2016 йилнинг декабрь ойи охирларида «темирйўлчилар» йиғинига келиб қўшилганди. «Олмалиқ»қа қарши кечган ҳамда «Локомотив»нинг 3:1 ҳисобидаги ғалабаси билан якунланган ўртоқлик ўйинида иккала легионер майдонга тушганди. Моҳамед Коне ҳимоя марказида ишончли ўйин кўрсатган бўлса, ҳужумчи Гноҳоре Кризо иккита гол уришга муваффақ бўлганди.
Маълумот учун, марказий ҳимоячи Моҳамед Коне 1993 йилнинг 12 декабрида туғилган. 23 ёшли футболчи 2015–2016 йилги мавсумни Молдованинг «Олимпия» клуби сафида ўтказиб, 25 та учрашувда майдонга тушган. Мавсумнинг қолган қисмида у Кипрнинг «Кармиотисса» клуби шарафини ҳимоя қилиб, 14 та учрашувда иштирок этган.
19 ёшли ҳужумчи Гноҳоре Кризо эса 1997 йилнинг 20 июнида таваллуд. Африкалик ёш ҳужумчи 2016 йилнинг биринчи даврасини Беларуснинг «Слуцк» клубида ўтказган. Иккинчи даврада эса Молдованинг «Саксан» жамоаси таркибига бориб қўшилган.
Аввалроқ «Локомотив» клуби «Насаф» ҳимоячиси Шуҳрат Муҳаммадиев ва «Олмалиқ» ярим ҳимоячиси Диёр Туропов билан шартнома тузганди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)