O‘zbekiston chempioni – Toshkentning “Lokomotiv” futbol klubi 21-dekabrdan yangi mavsum oldidan ilk yig‘inini boshladi. Klub matbuot xizmatining ma’lum qilishicha, jamoa yig‘inida 2 nafar Kot-d’Ivuar vakili ko‘rikdan o‘tmoqda. Bular – 23 yoshli markaziy himoyachi Mohamed Gnontcha Kone hamda 19 yoshli hujumchi Gnohere Krizo.
Xabarda qayd etilishicha, har ikki futbolchi ham “Lokomotiv”ning 27-dekabr kuni bo‘lib o‘tgan mashg‘ulotda ishtirok etdi. Ertaga, 28-dekabr kuni jamoa murabbiylar shtabi afrikalik futbolchilarning harakatlariga “Olmaliq”qa qarshi o‘tadigan o‘rtoqlik uchrashuvida baho berib olish imkoniga ega bo‘ladi.
“Agar Kone hamda Krizoning harakatlari murabbiylarga ma’qul kelsa, ular jamoamizning navbatdagi yig‘inlariga ham taklif etiladi”, – deyiladi xabarda.
“Lokomotiv” matbuot xizmatining ma’lumotiga ko‘ra, Mohamed Kone ilgari Gretsiya, Moldova, Kipr chempionatlarida to‘p surgan. Gnohere Krizo esa Belarus va Moldova chempionatlarida faoliyat yuritgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)