Boxing day. “Chelsi”dan yangi rekord, Mxitaryanning har uchinchi zarbasi gol, Moyes “Old Trafford”ga qaytdi

Kecha — 26-dekabr kuni futbol bo‘yicha Angliya Premyer-Ligasida 18-tur uchrashuvlaridan 8 tasiga yakun yasaldi.

Tur davomida bir qator qiziqarli voqealar va raqamlar kuzatildi. Ular bilan quyida tanishish mumkin.

“Chelsi”dan yangi rekord

London “aristokratlar”i 2009-yilning aprel oyidan boshlab, sentabrga qadar bo‘lgan barcha uchrashuvlarda zafar quchib, ketma-ket 11 g‘alabani tantana qilgandi. Bu esa jamoa rekordi hisoblanardi.

Antonio Konte boshqaruvida “Chelsi” o‘sha rekordni yangiladi. Premyer-Liganing ketma-ket 12 ta turida zafar quchgan “Chelsi”, 2016-yilni peshqadam sifatida yakunlaydigan bo‘ldi.

Qayd etish kerak, bu borada haqiqiy rekord “Arsenal” klubiga tegishli. “To‘pchilar” 2002-yilning 10-fevralidan boshlab, 24-avgust sanasigacha ketma-ket 14 ta o‘yinda zafar quchishning uddasidan chiqa olgan.

Birinchi bor sof hujumchisiz o‘ynashga majbur bo‘ldik. Hozir bizda Batshuayi bor, u APLga sekin-asta ko‘nikmoqda. Chempionatda ketma-ket 12 bor zafar quchish bu fantastika, biroq to‘xtab qolish kerak emas.

Antonio Konte

Eden Azar

Belgiyalik futbolchi ham “Chelsi” tarixidan o‘rin oldi. U “aristokratlar” uchun 50 ta gol urgan oltinchi futbolchiga aylanib oldi. Azarga qadar bu dovondan Didye Drogba, Frenk Lempard, Janfranko Zola, Jimmi Floyd Xasselbank va Eydur Gudyonsen kabi futbolchilar o‘ta olgandi.

APLda to‘p surgan yarim himoyachilar tasnifida olib qaraganda, 50 ta gol urishi eng tez qayd etilgan futbolchi “Arsenal”dan Rober Pires bo‘ladi. Azar bu borada ikkinchiga aylanib oldi.

Genrix Mxitaryan

Armanistonlik futbolchining “Yunayted” safidagi debyutlari u qadar yaxshi chiqmagandi. U sekin-asta yangi klubiga ko‘nikib borayotganini so‘nggi natijalaridan bilish qiyin emas.

Mxitaryanning so‘nggi vaqtlarda har uch zarbasidan biri gol bilan yakunlanmoqda. Ishonmasangiz, “Tottenhem”, “Zarya”, “Sanderlend” kabi klublarga qarshi o‘yinlar statistikasiga e’tibor bering.

“Bu hayotimdagi eng yaxshi gol, — deb aytib o‘tdi Mxitaryan “Sanderlend” darvozasini ishg‘ol qilgach. — Zarbadan keyin darhol laynsmenga qaradim, u bayroqchasini ko‘tarmaganidan keyingina golni nishonlashga tushdim”.

Zlatan Ibrahimovich

18-turga qadar “qizil iblislar” safida 16 ta o‘yinda ishtirok etgan Zlatan, 11 ta gol urishning uddasidan chiqa oldi. Bu esa Diyego Kosta va Aleksis Sanchesdan keyingi uchinchi ko‘rsatkichdir.

Statistiklar ma’lumotiga ko‘ra, noyabr oyidan buyon Zlatan darvozaga 8 bor zarba bergan. Shularning 7 tasi yakunda gol bilan tugagan. Bu ajoyib ko‘rsatkich.

Umuman olganda, Zlatan uchun dekabr oyi juda omadli hisoblanadi. Kuchli beshlik milliy chempionatlarida 2004—05-yilgi mavsumdan boshlab hisoblaganda Ibrahimovich dekabr oyining o‘zida 40 ta gol urishga muvaffaq bo‘lgan.

Devid Moyes

Moyes “Old Trafford” eshiklaridan chiqarib yuborilgach, o‘zga jamoa murabbiyi sifatida bu stadionga ilk bor qadam qo‘ydi.

‘Yunayted’ muxlislari meni juda yaxshi qarshi olishdi. Fanatlarning sezilarli qismi o‘zini yaxshi tutdi.

Devid Moyes

Qayd etish kerak, afsonaviy Ser Aleks Fergyuson o‘zidan keyin vatandoshi Moyesni murabbiy sifatida qoldirgan, biroq shotlandiyalik mutaxassisga bir mavsumdan keyinoq chiqish eshiklari ko‘rsatib qo‘yilgandi.

To‘yga to‘yona

“Manchester Siti”ning g‘alabasida Yaya Turening xizmati katta bo‘ldi. Jamoaning eng faxriy futbolchisi “Xall Siti”ga qarshi bellashuvda hisob ochuvchi golga mualliflik qildi.

Kecha o‘g‘limning tug‘ilgan kuni edi. Sovg‘a sifatida u gol urishimni so‘radi. Men buni amalga oshirdim va gol urilgan to‘pni unga sovg‘a qilish uchun oldim.Yaya Ture

Yayaning goli sabab “Manchester Siti” turnir jadvalida 2-o‘ringa ko‘tarilib oldi.

“Vest Hem” — 650 million?

Jahonga mashhur Red Bull kompaniyasi Londonning “Vest Hem” klubini xarid qilish taklifi bilan chiqqani, biroq rahbariyat bunga qarshi bo‘lgani haqidagi xabar Angliya nashrlarida ko‘rinish berdi.

Avstriya kompaniyasi “Vest Hem” xo‘jayinlari uchun 650 million funt taklif qilgan. Biroq bu narx klub egalarini qanoatlantirmagan.

Jeymi Vardi

“Lester” hujumchisi “Everton”ga qarshi bo‘lib o‘tgan 18-tur uchrashuvida ishtirok eta olmadi. Chunki uni “Stok Siti”ga qarshi bo‘lib o‘tgan 17-tur o‘yinidan keyin 3 ta bellashuvga chetlatishdi.

APLning bu qaroriga norozilik sifatida “Lester”ning 30 ming muxlisi Vardi aks etgan niqoblarni taqib, “Everton”ga qarshi o‘yinni tomosha qildi. Hujumchining o‘zi ham o‘zi aks etgan niqobda ko‘rindi, uning xotini ham shunday qildi.