Кеча — 26 декабрь куни футбол бўйича Англия Премьер-Лигасида 18-тур учрашувларидан 8 тасига якун ясалди.
Тур давомида бир қатор қизиқарли воқеалар ва рақамлар кузатилди. Улар билан қуйида танишиш мумкин.
«Челси»дан янги рекорд
Лондон «аристократлар»и 2009 йилнинг апрель ойидан бошлаб, сентябрга қадар бўлган барча учрашувларда зафар қучиб, кетма-кет 11 ғалабани тантана қилганди. Бу эса жамоа рекорди ҳисобланарди.Антонио Конте бошқарувида «Челси» ўша рекордни янгилади. Премьер-Лиганинг кетма-кет 12 та турида зафар қучган «Челси», 2016 йилни пешқадам сифатида якунлайдиган бўлди.
Қайд этиш керак, бу борада ҳақиқий рекорд «Арсенал» клубига тегишли. «Тўпчилар» 2002 йилнинг 10 февралидан бошлаб, 24 август санасигача кетма-кет 14 та ўйинда зафар қучишнинг уддасидан чиқа олган.
Антонио Конте: «Биринчи бор соф ҳужумчисиз ўйнашга мажбур бўлдик. Ҳозир бизда Батшуайи бор, у АПЛга секин-аста кўникмоқда. Чемпионатда кетма-кет 12 бор зафар қучиш бу фантастика, бироқ тўхтаб қолиш керак эмас».
Эден Азар
Бельгиялик футболчи ҳам «Челси» тарихидан ўрин олди. У «аристократлар» учун 50 та гол урган олтинчи футболчига айланиб олди. Азарга қадар бу довондан Дидье Дрогба, Фрэнк Лемпард, Жанфранко Зола, Жимми Флойд Хасселбанк ва Эйдур Гудйонсен каби футболчилар ўта олганди.
АПЛда тўп сурган ярим ҳимоячилар таснифида олиб қараганда, 50 та гол уриши энг тез қайд этилган футболчи «Арсенал»дан Робер Пирес бўлади. Азар бу борада иккинчига айланиб олди.
Генрих Мхитарян
Арманистонлик футболчининг «Юнайтед» сафидаги дебютлари у қадар яхши чиқмаганди. У секин-аста янги клубига кўникиб бораётганини сўнгги натижаларидан билиш қийин эмас.
Мхитаряннинг сўнгги вақтларда ҳар уч зарбасидан бири гол билан якунланмоқда. Ишонмасангиз, «Тоттенҳэм», «Заря», «Сандерленд» каби клубларга қарши ўйинлар статистикасига эътибор беринг.
«Бу ҳаётимдаги энг яхши гол, — деб айтиб ўтди Мхитарян «Сандерленд» дарвозасини ишғол қилгач. — Зарбадан кейин дарҳол лайнсменга қарадим, у байроқчасини кўтармаганидан кейингина голни нишонлашга тушдим».
Златан Ибраҳимович
18-турга қадар «қизил иблислар» сафида 16 та ўйинда иштирок этган Златан, 11 та гол уришнинг уддасидан чиқа олди. Бу эса Диего Коста ва Алексис Санчесдан кейинги учинчи кўрсаткичдир.
Статистиклар маълумотига кўра, ноябрь ойидан буён Златан дарвозага 8 бор зарба берган. Шуларнинг 7 таси якунда гол билан тугаган. Бу ажойиб кўрсаткич.
Умуман олганда, Златан учун декабрь ойи жуда омадли ҳисобланади. Кучли бешлик миллий чемпионатларида 2004—05 йилги мавсумдан бошлаб ҳисоблаганда Ибраҳимович декабрь ойининг ўзида 40 та гол уришга муваффақ бўлган.
Дэвид Мойес
Мойес «Олд Траффорд» эшикларидан чиқариб юборилгач, ўзга жамоа мураббийи сифатида бу стадионга илк бор қадам қўйди.
«‘Юнайтед’ мухлислари мени жуда яхши қарши олишди. Фанатларнинг сезиларли қисми ўзини яхши тутди», — таъкидлади Мойес.
Қайд этиш керак, афсонавий Сэр Алекс Фергюсон ўзидан кейин ватандоши Мойесни мураббий сифатида қолдирган, бироқ шотландиялик мутахассисга бир мавсумдан кейиноқ чиқиш эшиклари кўрсатиб қўйилганди.
Тўйга тўёна
«Манчестер Сити»нинг ғалабасида Яя Туренинг хизмати катта бўлди. Жамоанинг энг фахрий футболчиси «Халл Сити»га қарши беллашувда ҳисоб очувчи голга муаллифлик қилди.
«Кеча ўғлимнинг туғилган куни эди. Совға сифатида у гол уришимни сўради. Мен буни амалга оширдим ва гол урилган тўпни унга совға қилиш учун олдим», — деб таъкидлади Туре.
Яянинг голи сабаб «Манчестер Сити» турнир жадвалида 2-ўринга кўтарилиб олди.«Вест Ҳэм» — 650 миллион?
Жаҳонга машҳур Red Bull компанияси Лондоннинг «Вест Ҳэм» клубини харид қилиш таклифи билан чиққани, бироқ раҳбарият бунга қарши бўлгани ҳақидаги хабар Англия нашрларида кўриниш берди.
Австрия компанияси «Вест Ҳэм» хўжайинлари учун 650 миллион фунт таклиф қилган. Бироқ бу нарх клуб эгаларини қаноатлантирмаган.Жейми Варди
«Лестер» ҳужумчиси «Эвертон»га қарши бўлиб ўтган 18-тур учрашувида иштирок эта олмади. Чунки уни «Сток Сити»га қарши бўлиб ўтган 17-тур ўйинидан кейин 3 та беллашувга четлатишди.
АПЛнинг бу қарорига норозилик сифатида «Лестер»нинг 30 минг мухлиси Варди акс этган ниқобларни тақиб, «Эвертон»га қарши ўйинни томоша қилди. Ҳужумчининг ўзи ҳам ўзи акс этган ниқобда кўринди, унинг хотини ҳам шундай қилди.
Изоҳ (0)