Ulug‘bek Ro‘ziqulov Pokiston bosh vaziri bilan muzokaralar o‘tkazdi

O‘zbekiston Bosh vaziri o‘rinbosari Ulug‘bek Ro‘ziqulov o‘tgan hafta Pokiston bosh vaziri Navaz Sharif bilan uchrashdi, deya xabar bermoqda UzDaily.

Muzokaralar chog‘ida tomonlar O‘zbekiston va Pokiston o‘rtasidagi savdo-iqtisodiy hamkorlikni kengaytirish masalalarini muhokama qildi. Xususan, ular energetika sohasidagi hamkorlik masalalarini ko‘rib chiqdi.

Navaz Sharif O‘zbekiston delegatsiyasining tashrifi ikkala mamlakat o‘rtasidagi ikki tomonlama munosabatlarni kengaytirish imkonini berishini ta’kidladi. U Pokiston O‘zbekiston bilan o‘zaro manfaatli aloqalarini yangi darajaga chiqarish niyatida ekanligini qo‘shimcha qildi.

Navaz Sharifning qayd etishicha, tomonlar O‘zbekiston va Pokiston o‘rtasida savdo, investitsiyalar va erkin tovar almashishni rivojlantirish uchun islohotlar o‘tkazishi kerak. U O‘zbekistonning qishloq xo‘jalik texnikasi sohasidagi hamkorlik bo‘yicha taklifini ma’qulladi.

Ulug‘bek Ro‘ziqulov Navaz Sharifga O‘zbekiston Prezidentining O‘zbekistonga tashrif buyurish taklifini yetkazdi. Taklif qabul qilindi.