Ayni paytda to‘rtinchi marotaba ona bo‘lish arafasida turgan xonanda Nilufar Usmonova “Qalampir.uz” sayti bilan suhbatda hayotidagi qora sahifa sifatida muhrlangan kun haqida so‘zlab berdi, deb yozadi “Darakchi.uz”.
Nilufar onasi O‘zbekiston xalq artisti Yulduz Usmonovaning 2015-yilning dekabr oyida Toshkentda o‘tkazilgan albom taqdimotini eslab, shu kuni juda tushkun kayfiyatda bo‘lgani, o‘sha kun hayotida og‘riqli iz qoldirganini aytdi.
“O‘shanda onam bilan navbatdagi duetni kuylash baxtiga muyassar bo‘lgan edim. Lekin bu quvonch tatimagan. Chunki bir kun avval homilam nobud bo‘lgan edi. Shu sababli o‘sha kunni hayotimdagi qora sahifa, deb bilaman.
San’atkorlarga mana shunday paytlarda juda qiyin. Bir tomonda oila, ikkinchi tomonda ish. Homilamni yo‘qotib, o‘z dardim o‘zimga yetib turgan paytda sahnaga chiqib qo‘shiq kuylashga bazo‘r kuch topganman. Chunki Yulduz Usmonova menga ishonch bildirgan, men esa shaxsiy muammolarimni deb u kishini chorasiz qoldirmasligim kerak edi. Bor kuchimni to‘plab, sahnada tabassum bilan qo‘shiq aytgan bo‘lsam-da, ichimdan nimalar o‘tgani faqat o‘zimga ayon”, — deydi Nilufar Usmonova.
Xonanda onasi bilan munosabatlari haqida gapirar ekan, Yulduz Usmonova oilasi yoki farzandini emas, aksincha, san’atini tanlagani, u uchun san’at birinchi o‘rinda turishini aytdi. “Men uchun esa birinchi o‘rinda oilam turadi. Oilam uchun san’atimni chetga suraman”, — deydi Usmonova.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)