“Real” mag‘lubiyatsiz seriyasini 35 o‘yinga yetkazib, yangi rekord o‘rnatdi

Madridning “Real” jamoasi Ispaniya La Ligasi 15-turida o‘z maydonida “Deportivo”ga qarshi bahs olib borib, 3:2 hisobida zafar quchdi.

“Real”ning Twitter’dagi sahifasida ma’lum qilinishicha, mazkur g‘alabadan keyin madridliklarning mag‘lubiyatsiz seriyasi 35 o‘yinga yetdi va klubning yangi rekordi o‘rnatildi. Jamoa mag‘lubiyatsiz o‘yinlardan iborat seriyaning 26 tasida g‘alaba qozonib, 9 tasida durang qayd etgan.

“Real”ning avvalgi, 34 uchrashuvdan iborat rekordi 1989-yilda, Leo Benxakker murabbiyligi ostida qayd etilgandi. Zinedin Zidan bosh murabbiyligi ostidagi jamoa ushbu rekordni avval takrorladi, keyin esa yangiladi.

Eslatib o‘tamiz, oxirgi marta “Qirollik klubi” 2016-yilning 6-aprel kuni, “Volfsburg”ga qarshi (0:2) YChLning 2015/16-yilgi mavsumining chorak final ilk o‘yinida mag‘lubiyatga uchragandi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.