AQShning Aeronavtika va kosmik makonni tadqiq qilish bo‘yicha milliy boshqarmasi (NASA) Amerikaning Curiosity marsoxodidagi tog‘ jinslarini to‘plash uchun mo‘ljallangan parmada qayd etilgan nosozlik sabablarini aniqlamoqda, deb yozadi “Kommersant”.
Nosozlik parmani harakatga keltiruvchi motorda aniqlandi. Marsoxodning harakati vaqtinchalik to‘xtatib qo‘yildi.
“Biz parma mexanizmini ehtiyotkorlik bilan tekshirish imkonini beruvchi qanday diagnostika testlarini o‘tkazishni aniqlamoqdamiz. Biz testlarni dastlab Yerdagi sinov marsoxodida o‘tkazamiz, so‘ng ularni Marsda takrorlaymiz”, — deyiladi tashkilot xabarida.
Nashr eslatishicha, olti g‘ildirakli Curiosity marsoxodi Marsga 2011-yil noyabrida yuborilgan, 2012-yil 6-avgustida u sayyoraning Geyl krateri hududidagi yuzasiga borib yetgan edi. Marsoxodni Tuluzadagi Sayyorashunoslik instituti astrofizigi Silvestr Moris boshqaradi.
Izoh (0)