O‘zbekiston Prezidenti saylovida yuz va yuz yoshdan oshgan tabarruk insonlar ham ovoz bermoqda, deya xabar bermoqda O‘zA.
Surxondaryo viloyati Muzrabot tumanidagi Sopollitepa mahallasida yashaydigan Badal bobo Xurramov 51 yil oddiy dehqon bo‘lib ishladi, traktor haydadi. Urush yillari front ortida mehnat qildi. Muzrabot tumanini bog‘u bo‘stonga aylantirishga munosib hissa qo‘shdi.
Turmush o‘rtog‘i Norxol momo bilan 9 farzandni tarbiyalab, voyaga yetkazdi. 50 ga yaqin nevara, o‘ndan ortiq chevaraning suyukli bobosiga aylandi. O‘zbekiston Birinchi Prezidenti Islom Karimovning 2011-yil 25-avgustdagi farmoniga muvofiq, Badal bobo “Shuhrat” medali bilan taqdirlandi.
Ayni paytda 106 yoshni qarshi olgan Badal bobo bardam, xotirasi mustahkam, fikri teran. U tumandagi 155-saylov uchastkasiga kelib, o‘zi tanlagan nomzodga ovoz berdi.
“Men ko‘rgan saylovlarning sanog‘i yo‘q. Lekin u paytlarda saylasang ham saylaysan, saylamasang ham saylaysan, deganday bitta nomzod ko‘rsatilardi. Xo‘p zamonlar ekan-da, birov nega bunday, saylov bo‘lsa bir necha nomzod orasidan tanlash kerak emasmi, demagan. Deyolmagan. Saylov deganlari shu bo‘lsa kerak, deb ketaverganmiz. Endi bari o‘zgardi. Bir necha nomzod. Tarjimai holi, dasturi bilan tanish-da, o‘zing ma’qul, deb bilganingga ovoz ber! Mana, saylov qanday bo‘lar ekan”, — deydi Badal bobo.
“Buning ustiga saylovchilar uchun yaratilgan sharoitlar-chi?! Taklifnoma berishga kelishganida komissiya a’zolari ‘bobo, uyingizga o‘zimiz quti olib kelamiz’, deyishdi. To‘g‘risi, ko‘nglimga tegdi. Xudoga shukr, hali kuch-quvvatim bor, uchastkaga o‘zim boraman, dedim. Mana, sahar mardonda kelib o‘zim ma’qul, deb bilgan nomzodni yoqlab, nabira, evarayu chevaralar, yurtimiz yoshlarining baxtu kamoli uchun ovoz berdim”, — deydi 106 yoshli bobo.
“Hayotimning kuchga to‘lgan yillari ko‘rmagan e’zoz va e’tiborga sazovor bo‘lganim ham, yildan-yilga o‘zimni yasharayotgandek his etib, farovon turmush kechirayotganim ham mamlakatimizdagi tinchlik-osoyishtalik, biz, keksalarga ko‘rsatilayotgan hurmatu e’zoz tufaylidir. Ilohim, tinchligimiz, to‘kin-sochinligimiz abadiy bo‘lsin! Mana shuning uchun ovoz berdimda, bolam!”, — deydi 106 yoshli Badal bobo.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)