Xatamjon Ketmonov sirdaryolik saylovchilar bilan uchrashdi
O‘zbekiston Respublikasi prezidentligiga nomzod Xatamjon Ketmonov sirdaryolik saylovchilar bilan uchrashdi. Sardoba tuman hokimligining majlislar zalida videokonferensiya tarzida tashkil etilgan uchrashuvda tumanlardagi studiyalar orqali 2 mingga yaqin saylovchi ishtirok etdi. Bu haqda O‘zXDP matbuot xizmati ma’lum qildi.
Uchrashuvni O‘zbekiston Respublikasi Oliy Majlisi Qonunchilik palatasi deputati Abdug‘affor Qirg‘izboyev olib bordi. Nomzodning ishonchli vakili, xalq deputatlari Sirdaryo viloyat Kengashi deputati Alisher Toshmatov yig‘ilganlarni Xatamjon Ketmonovning tarjimai holi bilan tanishtirdi.
Shundan so‘ng so‘z O‘zbekiston Respublikasi Prezidentligiga nomzodga berildi. Xatamjon Ketmonov Sirdaryo viloyati bir paytlar Mirzacho‘l deb atalgani va mustaqillik yillarida mamlakatdagi eng istiqbolli mintaqalaridan biriga aylangani, bugungi kunda esa elektr energetikasi, yengil sanoat, oziq-ovqat hamda qurilish materiallari ishlab chiqarish rivojlangan hududlardan biri hisoblanishini ta’kidladi.
Nomzod 4-dekabr kuni bo‘lib o‘tadigan saylovda sirdaryoliklar ham faol ishtirok etishiga ishonch bildirdi.
Ma’ruza yuzasidan bir qator ishtirokchilar so‘zga chiqdi. Shundan so‘ng savol-javoblarga o‘tildi. Unda saylovchilar o‘zlarini qiziqtirgan savollarga nomzod va uning ishonchli vakillaridan atroflicha javob oldi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
