Toshkentda “Bolalik dunyosi–2016” xalqaro ko‘rgazmasi bo‘lib o‘tdi

“O‘zekspomarkaz” majmui hamda “Expo Position” mas’uliyati cheklangan jamiyati tomonidan tashkil etilgan “Bolalik dunyosi–2016” V xalqaro ko‘rgazmasida mahalliy korxonalar qatorida Germaniya, Fransiya, Turkiya, Hindiston, Xitoy, Janubiy Koreya, Rossiya kabi davlatlarning 45 dan ziyod kompaniyasi vakillari ishtirok etdi. Bu haqda O‘zA xabar bermoqda.

Ko‘rgazmada bolalar uchun turli o‘yinchoqlar, gigiyena va kosmetika vositalari, vitamin hamda dori-darmonlar, oziq-ovqatlar, kiyimlar, aksessuarlar, shuningdek, bolalar bayramlari uchun ishlab chiqilgan maxsus buyumlar namoyish etildi. Ko‘rgazmada bolalar o‘yinchoqlari do‘konlari, ishlab chiqarish korxonalari, bolalar uchun mo‘ljallangan jurnal va gazetalar ham taqdimotlar o‘tkazdi.

Ko‘rgazma ishtirokchilari ko‘lami ushbu tadbirning naqadar muhim ekanidan dalolat berdi. Yuzlab ishtirokchilar bolalarning bejirim liboslari, maktab anjomlari va boshqa mahsulotlari savdosida ishtirok etdi, yetakchi mutaxassislardan maslahat olish imkoniga ega bo‘ldi. Bolajonlar esa ular uchun tashkil etilgan mahorat saboqlari va qiziqarli ko‘ngilochar dasturlarda qatnashdi.

Xalqaro ko‘rgazma doirasida bolalar uchun turli anjumanlar, modalar namoyishi uyushtirilib, kitoblar, ta’lim muassasalari, davriy nashrlar haqida ham batafsil ma’lumot berildi.