BMT Mosul hududida majburiy ko‘chganlar soni 60 ming kishiga yetganini ma’lum qildi

17-oktabrda Iroqning Mosul shahrini IShID jangarilaridan tozalash bo‘yicha operatsiya boshlanganidan buyon ushbu hududda majburiy ko‘chgan odamlar soni 60 ming kishiga yetdi va bu ko‘rsatkich o‘sishda davom etmoqda. Bu haqda BMT gumanitar masalalarni muvofiqlashtirish boshqarmasi tarqatgan bayonotda aytiladi, deb xabar bermoqda “TASS”.

Qochqinlarning to‘rtdan uch qismi Mosuldan sharqdagi va janubdagi — Naynava, Anbar va Arbildagi lagerlarda qo‘nim topdi, qolganlar esa qabul qilayotgan jamoalar va jamoatchilik binolarida istiqomat qilmoqda.

Gumanitar agentliklar 45 ming qochqinni lagerlarga joylashtirdi, yana 47 ming kishilik joylar borligi aytilmoqda. Qo‘shimcha tarzda yana 453 ming kishini joylashtirish maqsadida boshqa joylarda ham qurilish ishlari jadallashtirilmoqda, deb ta’kidlanadi bayonotda.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.