Tojikistonda 29-oktabr, shanba kuni Rog‘un GESining dunyodagi eng yirik suv to‘g‘oni (335 metr) qurilishi boshlandi. To‘g‘on qurilishining boshlanishi hamda Vaxsh daryosi o‘zanining to‘silishini mamlakat prezidenti Emomali Rahmon, hukumat a’zolari va parlamentariylar kuzatib turdi, deb xabar beradi “TASS”.
Rog‘un GESi Vaxsh GES kaskadida to‘qqizinchi bo‘lib, Dushanbedan 110 kilometr janubi-sharqda joylashgan. Loyihaviy quvvati — 3600 MVt, o‘rtacha yillik ishlab chiqarish — 13,1 milliard kVt/soat. GES binosida har birining quvvati 600 MVt ga teng oltita radial-o‘qli gidroagregat o‘rnatiladi.
To‘g‘on qad ko‘targach, uning ortida 13,3 kilometr kub to‘liq hajmga, 10,3 kilometr kub foydali hajmga ega Rog‘un suv ombori paydo bo‘ladi.
Loyihaning to‘liq qurib bitirilishiga 2,2 milliard dollar, birinchi navbatining qurib bitirilishiga 590 million dollar ketishi aytilmoqda. Rog‘un GESining birinchi agregati 2018-yil oxirida, ikkinchisi esa 2019-yil aprelida ishga tushirilishi kutilmoqda.
Izoh (0)