Joriy yilning 24—25-oktabr kunlari Oliy Majlis Qonunchilik palatasi Demokratik institutlar, nodavlat tashkilotlar va fuqarolarning o‘zini o‘zi boshqarish organlari qo‘mitasi raisi Akmal Saidov boshchiligidagi parlament delegatsiyasi amaliy tashrif bilan Germaniyada bo‘ldi. Bu haqda UzDaily xabar bermoqda.
Tashrif doirasida mamlakat parlamenti — Bundestag, unda ko‘p o‘ringa ega bo‘lgan Germaniya sotsial-demokratik partiyasi (GSDP) va Germaniya xristian-demokratik ittifoqi (GXDI) deputatlari bilan uchrashuvlar o‘tkazildi. Germaniya hukumati, parlamenti, jamoatchilik, ekspert-akademik doiralar hamda OAV vakillari ishtirokida “O‘zbekiston Respublikasi Prezidenti sayloviga tayyorgarlik ko‘rish hamda uni o‘tkazishning demokratik standartlari” mavzusida davra suhbati tashkil etildi.
Tadbirlar chog‘ida Germaniya tomoni O‘zbekistondagi ijtimoiy-iqtisodiy va siyosiy-huquqiy jarayonlarning borishi, sud-huquq sohasida amalga oshirilayotgan islohotlar, fuqarolik jamiyati institutlarini yanada mustahkamlashga qaratilgan chora-tadbirlar bilan tanishtirildi.
Uchrashuvlarda qatnashchilarga O‘zbekiston Respublikasi Prezidenti sayloviga tayyorgarlik ko‘rish jarayonlari, ushbu muhim siyosiy tadbirni xalqaro standartlarga muvofiq o‘tkazishning huquqiy kafolatlari xususida batafsil ma’lumot berildi.
O‘zbekiston rahbariyati tomonidan jamiyatni demokratlashtirish, sud tizimi mustaqilligini mustahkamlash va iqtisodiyotni liberallashtirish bo‘yicha amalga oshirilayotgan ishlar haqidagi ma’lumotlar Germaniya tomonida katta qiziqish uyg‘otdi. Ayniqsa, O‘zbekiston Respublikasi Bosh vazirining virtual qabulxonasi faoliyat boshlagani ko‘pchilikning diqqatini tortdi. Mazkur qadam, ishtirokchilarning fikricha, aholining manfaatlari hamda farovonligi O‘zbekiston ijro hokimiyati uchun birinchi galdagi vazifa ekanidan dalolat beradi.
Davra suhbati davomida germaniyalik ekspertlar O‘zbekistonda yaratilgan barqaror siyosiy tizim, takomillashtirilgan saylov qonunchiligi, ko‘p sonli mahalliy va xalqaro kuzatuvchilarning ishtiroki bo‘lg‘usi saylovlar demokratik tamoyillarga mos ravishda o‘tkazilishini ta’minlashiga ishonch bildirdi.
Izoh (0)