Жорий йилнинг 24—25 октябрь кунлари Олий Мажлис Қонунчилик палатаси Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси раиси Акмал Саидов бошчилигидаги парламент делегацияси амалий ташриф билан Германияда бўлди. Бу ҳақда UzDaily хабар бермоқда.
Ташриф доирасида мамлакат парламенти — Бундестаг, унда кўп ўринга эга бўлган Германия социал-демократик партияси (ГСДП) ва Германия христиан-демократик иттифоқи (ГХДИ) депутатлари билан учрашувлар ўтказилди. Германия ҳукумати, парламенти, жамоатчилик, эксперт-академик доиралар ҳамда ОАВ вакиллари иштирокида «Ўзбекистон Республикаси Президенти сайловига тайёргарлик кўриш ҳамда уни ўтказишнинг демократик стандартлари» мавзусида давра суҳбати ташкил этилди.
Тадбирлар чоғида Германия томони Ўзбекистондаги ижтимоий-иқтисодий ва сиёсий-ҳуқуқий жараёнларнинг бориши, суд-ҳуқуқ соҳасида амалга оширилаётган ислоҳотлар, фуқаролик жамияти институтларини янада мустаҳкамлашга қаратилган чора-тадбирлар билан таништирилди.
Учрашувларда қатнашчиларга Ўзбекистон Республикаси Президенти сайловига тайёргарлик кўриш жараёнлари, ушбу муҳим сиёсий тадбирни халқаро стандартларга мувофиқ ўтказишнинг ҳуқуқий кафолатлари хусусида батафсил маълумот берилди.
Ўзбекистон раҳбарияти томонидан жамиятни демократлаштириш, суд тизими мустақиллигини мустаҳкамлаш ва иқтисодиётни либераллаштириш бўйича амалга оширилаётган ишлар ҳақидаги маълумотлар Германия томонида катта қизиқиш уйғотди. Айниқса, Ўзбекистон Республикаси Бош вазирининг виртуал қабулхонаси фаолият бошлагани кўпчиликнинг диққатини тортди. Мазкур қадам, иштирокчиларнинг фикрича, аҳолининг манфаатлари ҳамда фаровонлиги Ўзбекистон ижро ҳокимияти учун биринчи галдаги вазифа эканидан далолат беради.
Давра суҳбати давомида германиялик экспертлар Ўзбекистонда яратилган барқарор сиёсий тизим, такомиллаштирилган сайлов қонунчилиги, кўп сонли маҳаллий ва халқаро кузатувчиларнинг иштироки бўлғуси сайловлар демократик тамойилларга мос равишда ўтказилишини таъминлашига ишонч билдирди.
Изоҳ (0)