Ozarbayjonning Trend agentligi portalida Boku xalqaro multikulturalizm markazi mediadepartamenti direktori, MDH mamlakatlari, Boltiqbo‘yi davlatlari va Gruziya ekspertlar ligasi a’zosi Tofiq Abbosovning maqolasi joylashtirildi. Unda ekspert Toshkentda bo‘lib o‘tgan Islom hamkorlik tashkiloti tashqi ishlar vazirlari kengashining 43-sessiyasi haqida o‘z fikrlarini bildirib o‘tdi, deb xabar beradi “Jahon”.
Nashrda ta’kidlanishicha, sessiyaning o‘tkazilish joyi sifatida Toshkent tanlangani ramziy ma’no kasb etadi, negaki ushbu shahar nafaqat Markaziy Osiyo, balki global miqyosda bunyodkorlik kuchlarining o‘ziga xos jamlanish markazi sifatida tarixiy noyoblik kasb etadi.
Muallifning qayd qilib o‘tishicha, mustaqillikning birinchi yillaridan boshlab mintaqaning asosiy mamlakati bo‘lmish O‘zbekiston sotsial va madaniy-gumanitar sohalarda murakkab vazifalarni bajarishga jiddiy kirishdi. Ekspertning fikricha, O‘zbekiston xalqaro muloqot uchun muhim maydoncha bo‘lib qolmoqda, u yerda tashabbuslar dunyo yuzini ko‘rmoqda, jahon hamjamiyati uchun ahamiyatli loyihalarga asos solinmoqda.
“O‘zbekiston tomonidan tashqi ishlar vazirlari kengashining 43-sessiyasi uchun tanlangan mavzu — ‘Ta’lim va maorif — tinchlik va bunyodkorlikka yo‘l’ — musulmon mamlakatlari xalqlarining bugungi avlodi yaxshi kelajakka intilayotganini ko‘rsatib turibdi”, — deyiladi maqolada.
O‘zbekiston Prezidenti vazifasini bajaruvchi Shavkat Mirziyoyevning Toshkent uchrashuvi ochilish marosimida qilgan chiqishiga to‘xtalar ekan, Tofiq Abbosov mamlakat rahbari Birinchi Prezident Islom Karimovning yoshlarning intellektual o‘sishi hamda ularga murakkab zamon vazifalarini to‘g‘ri tushunishni o‘rgatish ishiga qo‘shgan hissasini qayd qilib o‘tganini aytdi.
Shu bilan bir qatorda, muallif Islom hamkorlik tashkilotining a’zo davlatlarning xavfsizlik, barqarorlik va barqaror rivojlanishni ta’minlash yo‘lidagi faoliyati jamoaviy xarakterda ekanligini qayd qilib o‘tdi. Shu bilan birga, tashkilot faoliyatida bitta mamlakatning tashabbusi ham hal qiluvchi ahamiyatga ega bo‘lishi mumkin. Shu ma’noda Toshkent har doim tashabbusni qo‘lga olishga, o‘zaro hamkorlikning samarador mexanizmlarini yaratish uchun zarur choralarni taklif etishga tayyor.
Izoh (0)