Xitoylik ekspertlar: O‘zbekistonning mintaqada tinchlik va barqarorlikni saqlashga bo‘lgan intilishi yuqori bahoga munosib
Shanxay ijtimoiy fanlar akademiyasida dekabr oyida bo‘lib o‘tadigan O‘zbekiston Prezidenti sayloviga bag‘ishlangan davra suhbati bo‘lib o‘tdi. Bu haqda “Jahon” xabar bermoqda.
Tadbir davomida mamlakatning ijtimoiy-siyosiy, sotsial-iqtisodiy va sud-huquq sohalarida amalga oshirilayotgan o‘zgarishlarning natijalari muhokama qilindi. Ishtirokchilar diqqati saylov qonunchiligini takomillashtirish bo‘yicha ko‘rilayotgan chora-tadbirlarga qaratildi. Yig‘ilganlarga saylovga ko‘rilayotgan tayyorgarlik, davlat rahbarligiga nomzodlar ko‘rsatgan siyosiy partiyalar hamda kuzatuvchilarning majburiyatlari xususida ma’lumot taqdim etildi.
Uchrashuv yakunlariga ko‘ra tadbirning bir qancha ishtirokchilari O‘zbekistonning zamonaviy rivojlanishi xususida o‘z fikrlarini bildirib o‘tdi.
Yuy Sinxue, Shanxay ijtimoiy fanlar akademiyasi partiya qo‘mitasi kotibi:
“O‘zbekiston haqida, saylovga tayyorgarlik bo‘yicha olib borilayotgan ishlar haqida yangi ma’lumotlar olish imkonini bergan navbatdagi sermazmun tadbirda ishtirok etganimdan xursandman.
Respublikangizdagi islohotlar 25 yil muqaddam Birinchi Prezident Islom Karimov tomonidan boshlangan jamiyat va davlatni tubdan yangilash kursining uzviy davomi bo‘lishiga ishonchim komil. Keng miqyosli islohotlar realizatsiyasi respublikani qisqa muddatda tubdan o‘zgartirib, uni mintaqada tinchlik va barqarorlikni ta’minlashga salmoqli hissa qo‘shayotgan industrial yetakchiga aylantirish imkonini berdi.
Bilamizki, O‘zbekiston Markaziy Osiyodagi eng muhim davlat bo‘lib, u nafaqat ichki vazifalarni hal etish, balki butun mintaqaning gullab-yashnashini ta’minlashga intilmoqda. Prezidentlik saylovi O‘zbekiston ijtimoiy-siyosiy hayotidagi muhim voqea ekanligini tushunamiz, shu bois uni muvaffaqiyatli ravishda yuqori professional darajada o‘tkazishni tilab qolamiz”.
Li Ixay, Shanxay ijtimoiy fanlar akademiyasi partiya qo‘mitasi qoshidagi propaganda departamenti direktori, Xalqaro tadqiqotlar munitsipal markazi direktori o‘rinbosari, Shanxay munitsipaliteti qoshidagi demokratiya va xavfsizlik dasturlari direktori:
“O‘zbekistonning mintaqada tinchlik va barqarorlikni saqlashga bo‘lgan intilishi, uning bloklardan tashqari maqomni saqlashga bo‘lgan sadoqati, harbiy ixtiloflarda ishtirok etmasligi yuqori bahoga munosibdir.
Xavfsizlik masalalari bo‘yicha mutaxassis sifatida Prezident vazifasini bajaruvchi Shavkat Mirziyoyevning Toshkentdagi Islom hamkorik tashkiloti Tashqi ishlar vazirlari kengashi 43-sessiyasining ochilish marosimidagi Yaqin Sharqda yadrosiz zona yaratish zarurligi haqidagi taklifini dolzarb deb hisoblayman. Bu mamlakatingizning Markaziy Osiyoda va undan tashqarida tinchlik va barqarorlikni o‘rnatish bo‘yicha ko‘plab tashabbuslari bilan hamohangdir.
2014–2015-yillardagi parlament va prezidentlik saylovlaridagi xalqaro kuzatuvchi sifatidagi ishtirokim davomida okrug va uchastka saylov komissiyalari ishi bilan tanishish imkoniyatiga ega bo‘lgan edim. Milliy saylov qonunchiligini takomillashtirish hamda Markaziy saylov komissiyasi vakolatlarini tashkiliy va huquqiy darajalarda kengaytirish yo‘li bilan saylov jarayonining adolatliligi va shaffofligini ta’minlash uchun barcha zaruriy sharoitlar yaratilgan.
Alohida ta’kidlash joizki, barcha to‘rt siyosiy partiya ham o‘z nomzodlarini ilgari surishda teng huquqqa ega.
Saylovoldi va’dalarini, birinchi galda, mamlakatdagi sotsial-iqtisodiy vaziyatni yaxshi biladigan, 4-dekabr kuni o‘z taqdirini yangi yetakchiga ishonadigan elektoratning umid va istaklariga quloq tutadigan har qanday nomzod bajara oladi.
Hech shubhasiz, O‘zbekiston fuqarolari, ko‘proq yoshlar tomonidan faol hayotiy va siyosiy pozitsiyaning namoyish etilishi saylovlarni demokratiya va xalqaro huquq prinsiplariga butunlay muvofiq ravishda muvaffaqiyatli o‘tkazishga ko‘mak beradi”.
Chjan Szyanjun, Shanxay ijtimoiy fanlar akademiyasi qoshidagi Rossiya va Markaziy Osiyo tadqiqotlari markazi direktori o‘rinbosari:
“Bugun O‘zbekiston barcha yo‘nalishlarda katta muvaffaqiyatlar ko‘rsatmoqda. Bu ijtimoiy va iqtisodiy rivojlangan, ko‘p konfessiyali va ko‘p millatli mamlakatdir.
Demokratik islohotlarni amalga oshirish ishidagi yutuqlar ko‘zga tashlanib turibdi. Xususan, har qanday fuqaroning butun hokimiyat vertikali bo‘ylab eshitilishiga yordam berayotgan Bosh vazir virtual qabulxonasining ochilishi alohida e’tiborga molik. Shu tariqa turli darajadagi dolzarb muammolar mantiqiy yechim topmoqda. Amalga oshirilayotgan o‘zgarishlar har bir kishi fuqarolik burchini mas’uliyat bilan bajarishiga, O‘zbekistonda islohotlar amalga oshirilishida ishtirok etishiga turtki bo‘lmoqda”.
