Шанхай ижтимоий фанлар академиясида декабрь ойида бўлиб ўтадиган Ўзбекистон Президенти сайловига бағишланган давра суҳбати бўлиб ўтди. Бу ҳақда «Жаҳон» хабар бермоқда.
Тадбир давомида мамлакатнинг ижтимоий-сиёсий, социал-иқтисодий ва суд-ҳуқуқ соҳаларида амалга оширилаётган ўзгаришларнинг натижалари муҳокама қилинди. Иштирокчилар диққати сайлов қонунчилигини такомиллаштириш бўйича кўрилаётган чора-тадбирларга қаратилди. Йиғилганларга сайловга кўрилаётган тайёргарлик, давлат раҳбарлигига номзодлар кўрсатган сиёсий партиялар ҳамда кузатувчиларнинг мажбуриятлари хусусида маълумот тақдим этилди.
Учрашув якунларига кўра тадбирнинг бир қанча иштирокчилари Ўзбекистоннинг замонавий ривожланиши хусусида ўз фикрларини билдириб ўтди.
Юй Синхуэ, Шанхай ижтимоий фанлар академияси партия қўмитаси котиби:
«Ўзбекистон ҳақида, сайловга тайёргарлик бўйича олиб борилаётган ишлар ҳақида янги маълумотлар олиш имконини берган навбатдаги сермазмун тадбирда иштирок этганимдан хурсандман.
Республикангиздаги ислоҳотлар 25 йил муқаддам Биринчи Президент Ислом Каримов томонидан бошланган жамият ва давлатни тубдан янгилаш курсининг узвий давоми бўлишига ишончим комил. Кенг миқёсли ислоҳотлар реализацияси республикани қисқа муддатда тубдан ўзгартириб, уни минтақада тинчлик ва барқарорликни таъминлашга салмоқли ҳисса қўшаётган индустриал етакчига айлантириш имконини берди.
Биламизки, Ўзбекистон Марказий Осиёдаги энг муҳим давлат бўлиб, у нафақат ички вазифаларни ҳал этиш, балки бутун минтақанинг гуллаб-яшнашини таъминлашга интилмоқда. Президентлик сайлови Ўзбекистон ижтимоий-сиёсий ҳаётидаги муҳим воқеа эканлигини тушунамиз, шу боис уни муваффақиятли равишда юқори профессионал даражада ўтказишни тилаб қоламиз».
Ли Ихай, Шанхай ижтимоий фанлар академияси партия қўмитаси қошидаги пропаганда департаменти директори, Халқаро тадқиқотлар муниципал маркази директори ўринбосари, Шанхай муниципалитети қошидаги демократия ва хавфсизлик дастурлари директори:
«Ўзбекистоннинг минтақада тинчлик ва барқарорликни сақлашга бўлган интилиши, унинг блоклардан ташқари мақомни сақлашга бўлган садоқати, ҳарбий ихтилофларда иштирок этмаслиги юқори баҳога муносибдир.
Хавфсизлик масалалари бўйича мутахассис сифатида Президент вазифасини бажарувчи Шавкат Мирзиёевнинг Тошкентдаги Ислом ҳамкорик ташкилоти Ташқи ишлар вазирлари кенгаши 43-сессиясининг очилиш маросимидаги Яқин Шарқда ядросиз зона яратиш зарурлиги ҳақидаги таклифини долзарб деб ҳисоблайман. Бу мамлакатингизнинг Марказий Осиёда ва ундан ташқарида тинчлик ва барқарорликни ўрнатиш бўйича кўплаб ташаббуслари билан ҳамоҳангдир.
2014–2015 йиллардаги парламент ва президентлик сайловларидаги халқаро кузатувчи сифатидаги иштироким давомида округ ва участка сайлов комиссиялари иши билан танишиш имкониятига эга бўлган эдим. Миллий сайлов қонунчилигини такомиллаштириш ҳамда Марказий сайлов комиссияси ваколатларини ташкилий ва ҳуқуқий даражаларда кенгайтириш йўли билан сайлов жараёнининг адолатлилиги ва шаффофлигини таъминлаш учун барча зарурий шароитлар яратилган.
Алоҳида таъкидлаш жоизки, барча тўрт сиёсий партия ҳам ўз номзодларини илгари суришда тенг ҳуқуққа эга.
Сайловолди ваъдаларини, биринчи галда, мамлакатдаги социал-иқтисодий вазиятни яхши биладиган, 4 декабрь куни ўз тақдирини янги етакчига ишонадиган электоратнинг умид ва истакларига қулоқ тутадиган ҳар қандай номзод бажара олади.
Ҳеч шубҳасиз, Ўзбекистон фуқаролари, кўпроқ ёшлар томонидан фаол ҳаётий ва сиёсий позициянинг намойиш этилиши сайловларни демократия ва халқаро ҳуқуқ принципларига бутунлай мувофиқ равишда муваффақиятли ўтказишга кўмак беради».
Чжан Цзяньжун, Шанхай ижтимоий фанлар академияси қошидаги Россия ва Марказий Осиё тадқиқотлари маркази директори ўринбосари:
«Бугун Ўзбекистон барча йўналишларда катта муваффақиятлар кўрсатмоқда. Бу ижтимоий ва иқтисодий ривожланган, кўп конфессияли ва кўп миллатли мамлакатдир.
Демократик ислоҳотларни амалга ошириш ишидаги ютуқлар кўзга ташланиб турибди. Хусусан, ҳар қандай фуқаронинг бутун ҳокимият вертикали бўйлаб эшитилишига ёрдам бераётган Бош вазир виртуал қабулхонасининг очилиши алоҳида эътиборга молик. Шу тариқа турли даражадаги долзарб муаммолар мантиқий ечим топмоқда. Амалга оширилаётган ўзгаришлар ҳар бир киши фуқаролик бурчини масъулият билан бажаришига, Ўзбекистонда ислоҳотлар амалга оширилишида иштирок этишига туртки бўлмоқда».
Изоҳ (0)