T-Mobile uyali aloqa operatori AQShning aloqa bo‘yicha federal komissiyasi da’volarini bartaraf etish uchun 48 million dollar jarima va tovon to‘laydi. Komissiya operatorni reklama kampaniyasida xizmatlari haqida to‘liq ma’lumot taqdim etmay, mijozlarni chalg‘itganlikda ayblamoqda. Bu haqda “TASS” xabar berdi.
Komissiyaga ko‘ra, T-Mobile mobil va internet-aloqa foydalanuvchilariga go‘yoki cheklanmagan kiruvchi va chiquvchi trafiklarni taqdim etgan, biroq abonentlar ko‘chirib olingan va yetkazib berilgan ma’lumotlar bo‘yicha ma’lum bir limitni oshirib yuborgach, internetga ulanish tezligi pasaytirilgan. Ushbu limit qaysi darajada o‘rnatilgani haqida foydalanuvchilarga ma’lumot berilmagan.
48 million dollardan bevosita jarima summasi 7,5 million dollarni tashkil etadi, 35,5 million dollar mijozlarga tovon to‘lash uchun yo‘naltiriladi. Qolgan 5 million dollarni T-Mobile xayriya maqsadlariga, jumladan, maktablar va ko‘p bolali kamxarj oilalarni bepul internet-aloqa bilan ta’minlashga sarflashi ko‘zda tutilgan.
Izoh (0)