Britaniya politsiyasi Bukingem saroyi darvozasidan oshib o‘tishga uringan yigitni qo‘lga oldi

Britaniya politsiyasi qirolicha Yelizaveta II ning Londondagi qarorgohi — Bukingem saroyi darvozasidan oshib o‘tishga uringan 21 yoshli yigitni qo‘lga oldi. Bu haqda, Skotlend-Yard bayonotiga tayanib, “TASS” xabar bermoqda.

Voqea 7-oktabr, juma kuni sodir bo‘ldi. Yigit saroyning janubiy darvozasiga chiqa boshlagani haqida xabar topgan politsiya xodimlari voqea joyiga yetib keldi va tartibbuzarni qo‘lga oldi.

Yigitning yonidan qurol topilmadi. Ayni paytda u hibsda. Shifokorlar uning ruhiy holatini tekshirib ko‘rganidan so‘ng voqea yuzasidan qaror qabul qilinadi.

O‘sha paytda Yelizaveta II Bukingemda bo‘lmay, Vindzor qasrida yangi unvonlar taqdim etish marosimida ishtirok etayotgan edi.