Pakistani Friends Overseas: Xorijiy kuzatuvchilar ishtiroki O‘zbekistonda saylov jarayoni ochiq-oshkoraligi tamoyillarini ta’minlaydi

Pokistonning Pakistani Friends Overseas nashri veb-saytida O‘zbekiston siyosiy partiyalari plenumlari, shuningdek, Markaziy saylov komissiyasi tomonidan xalqaro kuzatuvchilar taklif etilishiga bag‘ishlangan maqola joylashtirildi. Bu haqda “Jahon” axborot agentligi xabar bermoqda.

Maqolada O‘zbekistonda siyosiy partiyalar plenumlari bo‘lib o‘tgani va ularda prezidentlik saylovlarida ishtirok etish uchun nomzodlar ilgari surilgani ma’lum qilindi. Shuningdek, Markaziy saylov komissiyasi YeXHT, ShHT, MDH ijroiya qo‘mitasi, Islom hamkorlik tashkiloti, Butundunyo kuzatuvchi organlar assotsiatsiyasi kabi tashkilot va tuzilmalarga O‘zbekiston Respublikasi Prezidenti sayloviga kuzatuvchilarni yuborish uchun rasman taklif jo‘natgani bildirildi.

Materialda saylovlarga tayyorgarlik va o‘tkazish bilan bog‘liq barcha tadbirlar, shuningdek, saylov kuni ovoz berish joylari hamda har bir saylov uchastkasida ovozlarni hisoblash jarayonida siyosiy partiyalar, OAV, xorijiy davlatlar, xalqaro tashkilotlar vakillari kuzatuvchi sifatida qatnashish huquqiga ega ekanligiga urg‘u berilgan.

Pakistani Friends Overseas O‘zbekiston Respublikasi Prezidenti saylovida xalqaro va xorijiy kuzatuvchilarning ishtirok etishi saylov jarayoni ochiq va oshkoraligi tamoyillarini ta’minlashga xizmat qilishini ta’kidladi.