Qarshida O‘zbekiston Respublikasi Prezidenti saylovini o‘tkazuvchi 13-Qashqadaryo okrug saylov komissiyasining saylov uchastkalarini tuzish masalalariga bag‘ishlangan majlisi bo‘lib o‘tdi. Bu haqda O‘zA xabar bermoqda.
— Shahar va tuman hokimliklari, harbiy qismlar komandirlarining saylov uchastkalarini tuzish to‘g‘risidagi taqdimnomalari ko‘rib chiqildi, — deydi 13-Qashqadaryo okrug saylov komissiyasi raisi Ismoil Jo‘rayev. — Viloyatda saylovchilarning umumiy soni 1 million 984 mingdan ziyod ekanini inobatga olib, 884 saylov uchastkasi tuzish to‘g‘risida qaror qabul qilindi. Saylov uchastkalarining tartib raqami, chegarasi va manzili ko‘rsatilgan ro‘yxati tasdiqlandi. Okrug saylov komissiyasining bu haqdagi tegishli qarori mahalliy matbuotda e’lon qilinadi.
Okrug saylov komissiyasi tomonidan ommaviy axborot vositalari xodimlari uchun o‘tkazilgan brifingda O‘zbekiston Respublikasi Prezidenti sayloviga tayyorgarlik ko‘rish yuzasidan viloyatda amalga oshirilayotgan ishlar to‘g‘risida atroflicha ma’lumot berildi.
Izoh (0)