O‘qituvchi va murabbiylar kuni munosabati bilan ta’lim-tarbiya tizimining bir qator xodimlari mukofotlandi

O‘zbekiston Respublikasi Prezidenti  vazifasini bajaruvchi Shavkat Mirziyoyev “O‘qituvchi va murabbiylar kuni munosabati bilan ta’lim-tarbiya tizimida alohida o‘rnak ko‘rsatgan xodimlardan bir guruhini mukofotlash to‘g‘risida”gi farmonni imzoladi.

“Mamlakatimizda yosh avlodning intellektual va ma’naviy salohiyatini yuksaltirish, ularni ona Vatanga muhabbat, istiqlol g‘oyalariga sadoqat ruhida tarbiyalash ishlariga qo‘shgan salmoqli hissasi, ta’lim-tarbiya tizimidagi ko‘p yillik samarali mehnati, yoshlarga ilm-fan asoslari va zamonaviy kasb-hunarlarni o‘rgatishdagi fidoyiligi hamda ijtimoiy hayotdagi faol ishtiroki uchun quyidagilarga faxriy unvonlar berilsin”, — deyiladi hujjatda.

Bir qator soha vakillari “O‘zbekiston Respublikasi xalq o‘qituvchisi”, “O‘zbekiston Respublikasida xizmat ko‘rsatgan xalq ta’limi xodimi”, “O‘zbekiston Respublikasida xizmat ko‘rsatgan yoshlar murabbiysi”, “O‘zbekiston Respublikasida xizmat ko‘rsatgan sport ustozi” unvonlariga ega bo‘ldi.

Bundan tashqari, “ta’lim tizimini rivojlantirish, o‘quv jarayoniga ilg‘or pedagogik texnologiyalarni joriy etish, chuqur bilim va kasb-hunarga ega malakali kadrlarni tayyorlash ishlariga qo‘shgan munosib hissasi, sog‘lom va barkamol avlodni voyaga yetkazish, yoshlarni vatanparvarlik, milliy va umuminsoniy qadriyatlarga hurmat ruhida tarbiyalashdagi katta xizmatlari uchun” bir qator ustoz va murabbiylar “Fidokorona xizmatlari uchun”, “Mehnat shuhrati”, II darajali “Sog‘lom avlod uchun”, “Do‘stlik” ordenlari hamda “Shuhrat” medali bilan taqdirlandi.

Hujjatning to‘liq matni O‘zAda keltirildi.