Osiyo Taraqqiyot Banki O‘zbekiston yalpi ichki mahsuloti (YIM) 2016-yilda 6,9 foizga o‘sishi bo‘yicha prognozini o‘zgarishsiz saqlab qoldi. Bu haqda bank tomonidan tayyorlangan “Osiyo taraqqiyotining yangilangan sharhi — 2016” hisobotida so‘z boradi, deya xabar bermoqda UzDaily.
Bank O‘zbekiston iqtisodiyotining o‘sishi bo‘yicha 2017-yilgi prognozini ham o‘zgarishsiz qoldirdi. OTB prognoziga ko‘ra, kelasi yili O‘zbekiston YIM hajmi 7,3 foizga o‘sishi kutilmoqda.
OTB ekspertlari O‘zbekistonda 2016-yili inflyatsiya darajasi 10 foiz, 2017-yili esa 11 foiz atrofida bo‘lishini taxmin qilmoqda.
Hisobotda O‘zbekiston iqtisodiyotining 2016—2017-yillardagi o‘sishi, avvalgidek, asosiy savdo sheriklari, jumladan, Rossiya, Xitoy va Qozog‘iston bozorlaridagi vaziyatning rivoji, eksport mahsulotlarining ayrim turlari, xususan, tabiiy gaz, oltin, mis va paxta narxlariga bog‘liq ekani ta’kidlangan.
OTB sanoatga investitsiyalar kiritish, ish haqi, pensiya va boshqa to‘lovlar miqdorini oshirish hisobiga ichki talabni rag‘batlantirishni O‘zbekiston iqtisodiyotining yaqin yillardagi o‘sishi asosiy manbalari sifatida ko‘rsatib o‘tgan.
Izoh (0)