Amerikaning Chevrolet kompaniyasi Tracker krossoverining 2026-yilgi yangilangan versiyasini ishlab chiqarishni boshladi. Bu haqda General Motors kompaniyasining Braziliyadagi bo‘limi saytida xabar berildi.
Avtomobil Braziliyaning San-Kaetano-du-Sul shahridagi zavodda yig‘ila boshladi. Yaqin orada mamlakat bo‘ylab dilerlar orqali sotuvga chiqariladi.
Tashqi ko‘rinish va dizayndagi yangiliklar
Yangi Tracker besh xil komplektatsiyada taklif qilinadi. Boshqa modellar qatorida Premier va RS versiyalari premium toifaga kiradi.
Yangilangan Tracker ikki qavatli old chiroqlar bilan jihozlangan. Yuqorida ingichka LED kunduzgi chiroqlar, pastroqda esa asosiy faralar joylashgan. Shuningdek, ixcham tumanga qarshi chiroqlar, yangilangan bamper va radiator panjarasi Chevrolet’ning Blazer va Equinox modellari uslubida bezatilgan.
Shuningdek, RS sport versiyasi saqlanib qolgan bo‘lib, qora rangdagi o‘ziga xos bezaklar — logotip, oynalar, g‘ildiraklar va o‘zgacha panjara dizayni bilan ajralib turadi.
Texnik jihatlar o‘zgarishsiz qolmoqda
Chevrolet kompaniyasi hozircha texnik xususiyatlarni rasman e’lon qilmagan bo‘lsa-da, ular oldingi versiyalardagidek qolishi kutilmoqda:
1.0 Turbo (117/121 ot kuchi);
1.2 Turbo (139/141 ot kuchi).
Ikkala motor ham benzin yoki etanolda va 6 bosqichli avtomatik uzatmalar qutisi bilan birga ishlaydi. Kelajakda Tracker’ning gibrid versiyasi ham chiqarilishi mumkin.
Avtomobilning ishlab chiqarilishi Braziliyadagi zavodda yo‘lga qo‘yilgan. Narxlar 119 900 dan 190 590 realgacha (taxminan 21 500 - 34 000 AQSH dollari) bo‘lishi kutilmoqda.
Rasmiy taqdimot
Tracker 2026 modelining to‘liq taqdimoti iyul oyida o‘tkazilishi kutilmoqda. Bu model Chevrolet’ning Lotin Amerikasi uchun yangilangan modellari orasida birinchi bo‘lib namoyish etiladi. Yil oxirigacha Onix, Onix Plus’ning restayling versiyalari va Xitoyda ishlab chiqarilgan elektr Spark EUV hamda Captiva modellari ham bozorga chiqarilishi rejalashtirilgan.
Tracker yangi modelining kelgusida Markaziy Osiyo, jumladan, O‘zbekiston bozorida ham paydo bo‘lishi ehtimoli yuqori.
Izoh (0)