Fransiyada teraktlar uyushtirishni rejalashtirgan ikki marokashlik mamlakatdan badarg‘a qilindi

Fransiyaning Lotaringiya mintaqasidagi Mets shahrida teraktlar uyushtirishni rejalashtirgan IShIDning ikki nafar tarafdori mamlakatdan Marokashga badarg‘a qilindi. Bu haqda “Interfaks” xabar bermoqda.

Marokash rasmiylariga ko‘ra, ular mazkur terrorchi guruh nomidan ikki davlatda ham keng ko‘lamli teraktlar amalga oshirishni mo‘ljallangan. Jumladan, Fransiyada Metsning markaziy qismidagi restoran va tungi klubda. Shuningdek, ko‘p qavatli turar-joyga o‘t qo‘yish ham reja qilingan.

Reduan Dabi va Ayyub Sadqiy yozgi ta’tillarning oxirgi haftasida jinoyatlarini amalga oshirishni mo‘ljallagan, biroq Marokash rasmiylari so‘roviga ko‘ra qo‘lga olindi va badarg‘a qilindi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.