Qozog‘istonning Olmaota viloyatida mamlakat hududida turkum teraktlar uyushtirishni rejalashtirgan radikal guruhning to‘rt nafar a’zosi qo‘lga olindi. Bu haqda Qozog‘iston milliy xavfsizlik qo‘mitasi (MXQ) matbuot xizmati ma’lum qildi, deya xabar beradi “Interfaks”.
“Qo‘lga olingan Qozog‘iston va Qirg‘iziston fuqarolari bo‘lgan guruh a’zolaridan qo‘lbola portlovchi qurilmalarni tayyorlash uchun tarkibiy qismlar hamda diniy-ekstremistik ruhdagi materiallar musodara etildi. Ular istiqomat joylari va maxsus jihozlangan maxfiy manzillarda bo‘lgan.
Radikallarning kuch tizimi xodimlari va MXQ, politsiya, harbiy qismlar bo‘linmalari joylashgan hududlarga qurolli hujumni amalga oshirish rejalari barbod qilindi. Ularning maqsadi kelgusi bosqichda aholi ommaviy to‘planish joylarida teraktlar uyushtirish bo‘lgan”, — deyiladi matbuot xizmatining 22-avgust, dushanba kuni tarqatilgan xabarida.
Tergov va tezkor qidiruv tadbirlari davom etmoqda, ularning natijalari to‘g‘risida qo‘shimcha ma’lum qilinishi bildirilgan.
Izoh (0)