Қозоғистоннинг Олмаота вилоятида мамлакат ҳудудида туркум терактлар уюштиришни режалаштирган радикал гуруҳнинг тўрт нафар аъзоси қўлга олинди. Бу ҳақда Қозоғистон миллий хавфсизлик қўмитаси (МХҚ) матбуот хизмати маълум қилди, дея хабар беради «Интерфакс».
«Қўлга олинган Қозоғистон ва Қирғизистон фуқаролари бўлган гуруҳ аъзоларидан қўлбола портловчи қурилмаларни тайёрлаш учун таркибий қисмлар ҳамда диний-экстремистик руҳдаги материаллар мусодара этилди. Улар истиқомат жойлари ва махсус жиҳозланган махфий манзилларда бўлган.
Радикалларнинг куч тизими ходимлари ва МХҚ, полиция, ҳарбий қисмлар бўлинмалари жойлашган ҳудудларга қуролли ҳужумни амалга ошириш режалари барбод қилинди. Уларнинг мақсади келгуси босқичда аҳоли оммавий тўпланиш жойларида терактлар уюштириш бўлган», — дейилади матбуот хизматининг 22 август, душанба куни тарқатилган хабарида.
Тергов ва тезкор қидирув тадбирлари давом этмоқда, уларнинг натижалари тўғрисида қўшимча маълум қилиниши билдирилган.
Изоҳ (0)