Rossiyalik Zarina Albegonova qizini qaytarish uchun Turkiya prezidenti Rajab Toyyib Erdo‘g‘onga ochiq xat bilan murojaat etdi. Maktub mahalliy Hurriyet nashrida e’lon qilindi, deb xabar beradi “TASS”.
Ochiq xatda ayol oxirgi besh yildan beri sudlarda qizi Aylinni qaytarish uchun kurashayotganini eslatib o‘tdi. Uning sobiq turmush o‘rtog‘i Murod Aydemir 2011-yilda qizini olib ketgan va shundan beri noqonuniy ravishda ushlab turibdi.
“Janob prezident, Siz so‘nggi umidimsiz. Men duch kelgan vaziyat bilan tanishsiz deb o‘ylayman, chunki Rossiya hukumati bu haqda Sizga ma’lum qilgan. Sizdan vaziyatni shaxsiy nazoratingizga olish va adolat qaror topishida yordam berishingizni so‘rayman”, — deyiladi maktubda.
Albegonova Aydemir bilan AQShda, universitetdagi tahsil chog‘ida tanishgandi. 2004-yili ular Zarina istiqomat qilgan Shimoliy Osetiyada nikohni ro‘yxatda o‘tkazgan va Turkiyaga ko‘chib o‘tgan, biroq ushbu mamlakatda nikoh qonuniylashtirilmagandi. 2008-yili oilada Aylin, 2010-yili esa hozirda onasi bilan yashayotgan kichik qizlari Selin tug‘ilgandi.
Izoh (0)