Londonda yangi rekord o‘rnatildi — u yerda Supermen’ning eng baland ommaviy haykali yaratildi. U balandligi 300 metrdan oshadigan “Shard” osmono‘par binosining cho‘qqisiga o‘rnatilgan.
Komiks qahramoni shaklidagi san’at asari 3,35 metr (11 fut) balandlikda bo‘lib, og‘irligi 120 kilogrammdan ortiq. Supermen’ning tanasi ekotoladan yasalgan, haykalchaning o‘zi esa fotopolimer qatronidan quyilgan. Ulkan kinoqahramon “Shard” osmono‘par binosining eng baland nuqtalariga ruxlangan po‘lat arqonlar yordamida mahkamlangan. Kino qahramoni oyog‘ini bukib, boshini pastga egib, go‘yo shaharni kuzatayotgandek tasvirlangan.
Supermen haykalchasini yaratish to‘rt oy davom etdi, ishda 20 dan ortiq kishi qatnashdi. Ular san’at asarini mukammal darajaga yetkazish uchun jami 2 000 soat mehnat qilgan.
Uning ustida ishlashga hozirda Supermen rolini ijro etayotgan Devid Korensvet jalb qilingan. Suratga olish jarayonida aktyorning qomati 3D formatda skanerlandi, kiyim va plashni yaratish uchun ko‘plab manbalar va materiallardan foydalanildi.
“Supermen” filmining ssenariy muallifi va rejissyori, shuningdek, DC Studios hamraisi Jeyms Gann The Sun bilan suhbatda o‘rnatilgan haykaldan hayratga tushganini ta’kidladi.
“The Shard cho‘qqisida bizning Supermen’imizning shunchalik haqiqiy tasvirini ko‘rish juda ajoyib”, deya taassurotlari bilan o‘rtoqlashdi Gann.
Ma’lumki, yaxshi ob-havo sharoitida haykalni 64 kilometr (40 mil) radiusda ko‘rish mumkin. Shuningdek, installyatsiya 11-iyul kuni Britaniyada bo‘lib o‘tadigan Supermen haqidagi yangi film premyerasiga bag‘ishlanganini ta’kidlash joiz.
The Shard vakillari “bu afsonaviy obrazni shunchalik jasur va hayajonli tarzda jonlantirishga hissa qo‘shganlaridan g‘oyat faxr tuyishlarini” bildirdi.
Yoshlar orasida yana bir superqahramon tobora mashhur bo‘lib bormoqda. Ilgari mutaxassislar o‘smirlarning O‘rgimchak odam kiyimini kiyib, atrofdagilarni o‘z xatti-harakatlari bilan bezovta qilish va ijtimoiy tarmoqlar uchun videolar suratga olishni yoqtirishini aytgan edi.
Izoh (0)