Россиялик Зарина Албегонова қизини қайтариш учун Туркия президенти Ражаб Тоййиб Эрдўғонга очиқ хат билан мурожаат этди. Мактуб маҳаллий Hurriyet нашрида эълон қилинди, деб хабар беради «ТАСС».
Очиқ хатда аёл охирги беш йилдан бери судларда қизи Айлинни қайтариш учун курашаётганини эслатиб ўтди. Унинг собиқ турмуш ўртоғи Мурод Айдемир 2011 йилда қизини олиб кетган ва шундан бери ноқонуний равишда ушлаб турибди.
«Жаноб президент, Сиз сўнгги умидимсиз. Мен дуч келган вазият билан танишсиз деб ўйлайман, чунки Россия ҳукумати бу ҳақда Сизга маълум қилган. Сиздан вазиятни шахсий назоратингизга олиш ва адолат қарор топишида ёрдам беришингизни сўрайман», — дейилади мактубда.
Албегонова Айдемир билан АҚШда, университетдаги таҳсил чоғида танишганди. 2004 йили улар Зарина истиқомат қилган Шимолий Осетияда никоҳни рўйхатда ўтказган ва Туркияга кўчиб ўтган, бироқ ушбу мамлакатда никоҳ қонунийлаштирилмаганди. 2008 йили оилада Айлин, 2010 йили эса ҳозирда онаси билан яшаётган кичик қизлари Селин туғилганди.
Изоҳ (0)