Shanxay hamkorlik tashkilotiga a’zo mamlakatlar davlat rahbarlari kengashining Toshkentda bo‘lib o‘tgan 2016-yilgi sammiti arafasida internet-nashrlarda O‘zbekiston xalq artisti Yulduz Usmonova mazkur tadbirga atab qo‘shiq kuylagani haqida xabarlar paydo bo‘ldi.
Qo‘shiqda nafaqat o‘zbek tilidagi, balki ShHTning asoschisi hisoblangan boshqa mamlakatlarning davlat tili — xitoy, qirg‘iz, qozoq, tojik va rus tilidagi so‘zlarni ham eshitish mumkin edi. Biroq bu qo‘shiq 2016-yilgi ShHT sammitiga bag‘ishlab kuylanmagani ma’lum bo‘ldi.
Xonandaning ashaddiy ishqibozlari bergan ma’lumotga ko‘ra, ShHTning 2016-yilgi Toshkent sammiti arafasida internetda ommalashib ketgan qo‘shiq aslida bundan salkam 10 yil avval yozilgan va u Yulduz Usmonovaning 2005-yilgi “Ayol” nomli albomidan “Do‘stlik” nomi bilan o‘rin olgan.
Yulduz Usmonovaning rasmiy sayti — “Yulduz.uz” ma’muri Azamat Qodirovning jurnalist Feruz Muhammadga ma’lum qilishicha, qo‘shiq haqiqatan ham Shanxay hamkorlik sammitiga bag‘ishlab kuylangan, biroq bunda gap 2016-yilgi emas, balki 2004-yilgi Toshkent sammiti haqida bormoqda.
“Keyinchalik 2005-yilgi ‘Ayol’ albomiga kiritilgan bu qo‘shiq ilk bor ‘Istiqlol’ san’at saroyida, sammitga bag‘ishlangan bayram dasturida kuylangan”, — deya qo‘shimcha qildi Azamat Qodirov.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)