Шанхай ҳамкорлик ташкилотига аъзо мамлакатлар давлат раҳбарлари кенгашининг Тошкентда бўлиб ўтган 2016 йилги саммити арафасида интернет-нашрларда Ўзбекистон халқ артисти Юлдуз Усмонова мазкур тадбирга атаб қўшиқ куйлагани ҳақида хабарлар пайдо бўлди.
Қўшиқда нафақат ўзбек тилидаги, балки ШҲТнинг асосчиси ҳисобланган бошқа мамлакатларнинг давлат тили — хитой, қирғиз, қозоқ, тожик ва рус тилидаги сўзларни ҳам эшитиш мумкин эди. Бироқ бу қўшиқ 2016 йилги ШҲТ саммитига бағишлаб куйланмагани маълум бўлди.
Хонанданинг ашаддий ишқибозлари берган маълумотга кўра, ШҲТнинг 2016 йилги Тошкент саммити арафасида интернетда оммалашиб кетган қўшиқ аслида бундан салкам 10 йил аввал ёзилган ва у Юлдуз Усмонованинг 2005 йилги «Аёл» номли альбомидан «Дўстлик» номи билан ўрин олган.
Юлдуз Усмонованинг расмий сайти — «Yulduz.uz» маъмури Азамат Қодировнинг журналист Феруз Муҳаммадга маълум қилишича, қўшиқ ҳақиқатан ҳам Шанхай ҳамкорлик саммитига бағишлаб куйланган, бироқ бунда гап 2016 йилги эмас, балки 2004 йилги Тошкент саммити ҳақида бормоқда.
«Кейинчалик 2005 йилги ‘Аёл’ альбомига киритилган бу қўшиқ илк бор ‘Истиқлол’ санъат саройида, саммитга бағишланган байрам дастурида куйланган», — дея қўшимча қилди Азамат Қодиров.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)