Tennischilar Rojer Federer va Stanislas Vavrinka Shveysariya terma jamoasi safida Toshkentga kelmaydi

16—18-sentabr kunlari Toshkent mezbonlik qiladigan tennis bo‘yicha Devis Kubogi doirasidagi O‘zbekiston — Shveysariya o‘yinida dunyoning uchinchi raqamli raketkasi Rojer Federer ishtirok etmaydi.

Federer bayonot berib, yil yakuniga qadar kortga tushmasligini e’lon qildi. U Rio-de-Janeyro Olimpiadasida ham ishtirok etmaydi.

“Olamsport” ma’lumotiga ko‘ra, beshinchi raketka Stanislas Vavrinka ham katta ehtimol bilan Toshkentga kelmaydi. O‘zbekiston terma jamoasiga qarshi o‘yinda ishtirok etishi mumkin bo‘lgan eng yaxshi tennischi esa ATP reytingida ayni vaqtda 125-o‘rinda bormoqda.

O‘zbekiston terma jamoasi Devis Kubogining avvalgi bosqichida Xitoyni 3:2 hisobida mag‘lubiyatga uchratgandi.