Turkiyadagi harbiy to‘ntarishga urinishdagi ishtiroki uchun hibsga olingan askarlar so‘roq vaqtida dastlab barcha voqealarni odatiy mashg‘ulot sifatida qabul qilganini ta’kidladi. Bu haqda, Hurriyet gazetasiga asoslanib, “RIA Novosti” xabar bermoqda.
Xabar berishlaricha, mazkur ta’kid Otaturk nomidagi aeroportda hibsga olingan harbiylar guruhi tomonidan aytilgan. Polkovnikning qo‘l ostida 10 zobit va 67 askar bo‘lgan.
So‘roq vaqtida gumonlanuvchilar voqealarni harbiy mashg‘ulot sifatida qabul qilganini aytib o‘tgan. “Odamlar tanklarning ustiga chiqishni boshlaganidan so‘nggina nima bo‘layotganini tushunib yetdik”, — deya gumonlanuvchilarning biridan iqtibos keltirmoqda gazeta.
Harbiylarning so‘zlariga ko‘ra, ularga rahbarlik qilayotgan polkovnik, politsiya bo‘linmalari yetib kelganidan so‘ng, chekinish haqida buyruq bergan.
16-iyulga o‘tar kechasi Turkiyada harbiy to‘ntarishga urinish yuz berdi. 16-iyul tongida esa isyonkor harbiylar taslim bo‘lishni boshladi. Turkiya bosh vazirining ma’lum qilishicha, to‘ntarishning barcha tashkilotchilari qo‘lga olingan.Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)