2016-yilning 12-iyul kuni Xalq ta’limi vazirligi tomonidan Maktabgacha ta’lim muassasalari xodimlarini qayta tayyorlash va malakasini oshirish respublika o‘quv-metodika Markazida maktabgacha ta’lim muassasalari tarbiyachilari o‘rtasida “Yil tarbiyachisi” ko‘rik-tanlovining respublika bosqichi o‘tkazildi. Bu haqda Xalq ta’limi vazirligi axborot xizmati xabar berdi.
Ko‘rik-tanlov 4 bosqichda o‘tkazilib, Qoraqalpog‘iston Respublikasi, Toshkent shahri va viloyatlar bo‘yicha g‘olib bo‘lgan maktabgacha ta’lim muassasalarining 14 nafar tarbiyachisi Respublika bosqichida ishtirok etdi.
Ishtirokchilar yakuniy bosqichda test savollari, bugungi kun tarbiyachisi qanday bo‘lishi kerakligi to‘g‘risidagi taqdimoti, tarbiyalanuvchilar bilan ochiq mashg‘ulot o‘tkazish, qo‘lda yasalgan didaktik materiallarni namoyish qilgan holda tarbiyalanuvchilar uchun ertak, hikoya yoki masallardan parcha ijro etish shartlarini bajardi.
Tanlov natijalariga ko‘ra Farg‘ona viloyati Quvasoy shahridagi 28-MTM tarbiyachisi Zaynobiddinova Gulasal 1-o‘rin, Samarqand shahridagi 60-MMTM tarbiyachisi Qobilova Munavvar 2-o‘rinni qo‘lga kiritgan bo‘lsa, 3-o‘ringa Toshkent shahri Shayxontohur tumanidagi 259-MTM tarbiyachisi Olimova Munisa loyiq deb topildi.
G‘oliblarga vazirlik va hamkor tashkilotlarning diplomlari va qimmatbaho sovg‘alar topshirildi.
Izoh (0)