Ronaldu Forbes talqini bo‘yicha 2016-yilning eng serdaromad sportchisi bo‘ldi

Forbes jurnalining talqini bo‘yicha dunyoning eng serdaromad sportchilari reytingini ilk marta futbolchi boshqardi. Ushbu reyting peshqadami “Real” va Portugaliya terma jamoasi hujumchisi Krishtianu Ronaldu bo‘ldi, deb xabar bermoqda “Sovsport.ru”.

Bir yil davomida Ronaldu 88 million dollar ishladi. Uning “Real” bilan 2018-yilgacha mo‘ljallangan shartnomasiga ko‘ra, Ronaldu yiliga maosh va turli bonuslar ko‘rinishida jami 53 million dollar ishlaydi. Qolgan daromad Nike, TAG Heuer, Herbalife, Clear Shampoo va boshqa kompaniyalar bilan tuzilgan homiylik shartnomalaridan keladi.

Ronaldu ortidan eng serdaromad sportchilar reytingidan “Barselona” hujumchisi Lionel Messi joy oldi. Argentinalik futbolchining daromadi 2015-yilga nisbatan 73,8 milliondan 81,4 million dollarga o‘sdi.

Eng ko‘p maosh oluvchi sportchilar reytingining kuchli uchligiga Milliy basketbol assotsiatsiyasining “Klivlend Kavalyers” hujumchisi Lebron Jeyms kirdi. Forbes uning daromadini 77,2 million dollarga baholadi.

“Sports.ru”ning qayd etishicha, so‘nggi 15 yil ichida mazkur reytingni faoliyatini yakunlamaguniga qadar amerikalik bokschi Floyd Meyvezer boshqarib kelgandi.

Quyida eng serdaromad sportchilar o‘nligi bilan tanishing:

1. Krishtianu Ronaldu (“Real”, futbol) – 88 million dollar;
2. Lionel Messi (“Barselona”, futbol) – 81,4 million dollar;
3. Lebron Jeyms (“Klivlend”, basketbol) – 77,2 million dollar;
4. Rojer Federer (tennis) – 67,8 million dollar;
5. Kevin Dyurent (“Oklaxoma-Siti”, basketbol) – 56,2 million dollar;
6. Novak Jokovich (tennis) – 55,8 million dollar;
7. Kemeron Nyuton (“Karolina”, Amerika futboli) – 53,1 million dollar;
8. Fil Mikelson (golf) – 52,9 million dollar;
9. Jordan Spif (golf) – 52,8 million dollar;
10. Kobe Brayant (“Leykers”, basketbol) – 50 million dollar.