AQShga tegishli Guantanamodagi (Kuba) qamoqxonaning kamida 12 nafar mahbusi ozod qilinganidan so‘ng Afg‘onistonda amerikaliklarni o‘ldirgan va ularning ittifoqdoshlariga hujumlar uyushtirgan. Bu haqda Oq uy vakiliga tayanib, Washington Post ma’lum qildi, deya xabar beradi “TASS”.
“Obama ma’muriyati Guantanamodagi qamoqxonadan ozod qilingan kamida 12 nafar mahbus Afg‘onistonda AQSh va uning ittifoqdoshlari kuchlariga hujumlarda ishtirok etganligini taxmin qiladi. Ular taxminan 6 nafar amerikalikning umriga zomin bo‘lgan”, — deyiladi gazeta maqolasida.
Oq uy ma’lumotlariga ko‘ra, Guantanamodan 2009-yilgacha ozod qilingan 542 nafar tutqundan 21 foizi jangovar harakatlarda ishtirok qilishda davom etgan. Obama prezidentligida esa 158 kishidan atigi 4,5 foizi ekstremistik faoliyatini tiklagan. Amerikalik huquq himoyachilari bu raqamlarga ishonmaydi, chunki ularni tekshirib ko‘rishning imkoni yo‘q.
Qamoqxona ochilgan 2002-yildan beri bu yerdan 700 nafar mahbus ozod etilgan, 80 kishi hozir ham panjara ortida qolmoqda.
Izoh (0)