Yaponiya chegaralariga Xitoy va Rossiya kemalari deyarli bir paytda yaqinlashganidan tashvish bildirdi

Yaponiya o‘zining hududiy suvlariga Xitoy va Rossiya harbiy kemalari yaqinlashganini qayd etdi. Tokio hozir bundagi ehtimoliy bog‘liqlikni o‘rganmoqda, deya xabar beradi “RBK”.

9-iyun, payshanbaga o‘tar kechasi Xitoy harbiy-dengiz floti fregati Sharqiy Xitoy dengizidagi Yaponiya o‘ziniki hisoblaydigan Senkaku orolidan (Xitoy ham bu orolga da’vo qilib keladi) 38 kilometr uzoqlikda suzib o‘tdi. Deyarli shu paytda orol yaqinida Rossiya harbiy-dengiz flotining uch kemasi ham paydo bo‘ldi.

Yaponiya tashqi ishlar vazirining o‘rinbosari Akitaka Sayki 9-iyun, payshanba kuni Xitoyning mamlakatdagi elchisini chaqirdi va sodir bo‘lgan hodisa yuzasidan jiddiy tashvish bildirdi. Yaponiya hukumati Rossiya va Xitoy kemalari harakatlari o‘zaro kelishilganligini aniqlash uchun mazkur holatni o‘rganishga kirishdi.

Xitoy mudofaa vazirligi o‘z kemalari harakatini “qonuniy” deb topdi. Rossiya rasmiylari esa hodisaga hozircha izoh bermagan.