Qirg‘iziston ichki ishlar idoralari Aqto‘bedagi voqealar munosabati bilan kuchaytirilgan tayyorgarlik tartibiga o‘tkazildi

Qirg‘iziston IIV Qozog‘istonning Aqto‘be shahridagi voqealar munosabati bilan mamlakat ichki ishlar idoralarini kuchaytirilgan jangovar tayyorgarlik tartibiga o‘tkazdi. Bu haqda vazirlik matbuot xizmati ma’lum qildi, deya xabar beradi “TASS”.

“Qozog‘iston Respublikasining Aktyubinsk viloyati hududida harbiy va qo‘riqlanadigan obyektlarga qurolli hujum uyushtirishda namoyon bo‘lgan, kishilar halok bo‘lishi va jarohatlanishiga olib kelgan terrorchi va ekstremistik tashkilotlar faollashuvi munosabati bilan ‘Qirg‘iziston Respublikasida jamoat tartibi va xavfsizlik, o‘ta muhim obyektlar qo‘riqlanishini ta’minlash bo‘yicha kechiktirib bo‘lmas choralar haqida’gi qaror qabul qilindi. Unga ko‘ra, 2016-yil 6-iyundan boshlab respublika ichki ishlar idoralarining barcha shaxsiy tarkibi kuchaytirilgan jangovar tayyorgarlik tartibiga o‘tkaziladi”, — deyiladi matbuot xizmati xabarida.

Qirg‘iziston IIVga ko‘ra, mazkur choralar 7-iyun, seshanba kuni mamlakat poytaxti Bishkekda MDH hukumat rahbarlari yig‘ilishi o‘tkazilishi bilan ham izohlanadi.