Chilida ekspertlar 7-iyun, seshanba kuni mamlakatning sobiq prezidenti Eduardo Frey Montalva jasadi qoldiqlarini eksgumatsiya qilishga kirishadi. Mutaxassislar diktator Augusto Pinochet josuslari tomonidan zaharlangani gumon qilinadigan siyosatchi o‘limi sabablariga oydinlik kiritish uchun yana bir bor suyak tahlilini o‘tkazishiga to‘g‘ri keladi. Bu haqda “TASS” xabar bermoqda.
Bu sobiq davlat rahbari jasadi qoldiqlarining ikkinchi bor eksgumatsiya qilinishi, oldinroq o‘tkazilgan tahlillar Montalva tanasida iprit va talliy izlari mavjudligi, 2013-yildagi o‘rganishlar esa zarin bilan zaharlanganlik alomatlarini ko‘rsatdi.
1964—1970-yillarda mamlakatni boshqargan va harbiy diktatura tuzumini keskin tanqid qilgan Frey Montalva 1982-yili poytaxt Santyagodagi kasalxonalardan birida vafot etdi. O‘limning rasmiy sababi sifatida o‘tkir peritonit (qorin pardasining yallig‘lanishi)ga olib kelgan bakterial infeksiya ko‘rsatildi.
2009-yili olti kishi, jumladan, shifokorlar va DINA maxfiy politsiyasi sobiq josuslariga sobiq prezidentni zaharlashda ayblov e’lon qilindi. 2014-yili tergov boshi berk ko‘chaga kirib qoldi va rasman yopildi. Biroq o‘tgan yili Chili apellyatsiya sudi Montalva o‘limi sabablarini o‘rganishni tiklash yuzasidan qaror qabul qildi.
Izoh (0)