Чилида экспертлар 7 июнь, сешанба куни мамлакатнинг собиқ президенти Эдуардо Фрей Монтальва жасади қолдиқларини эксгумация қилишга киришади. Мутахассислар диктатор Аугусто Пиночет жосуслари томонидан заҳарлангани гумон қилинадиган сиёсатчи ўлими сабабларига ойдинлик киритиш учун яна бир бор суяк таҳлилини ўтказишига тўғри келади. Бу ҳақда «ТАСС» хабар бермоқда.
Бу собиқ давлат раҳбари жасади қолдиқларининг иккинчи бор эксгумация қилиниши, олдинроқ ўтказилган таҳлиллар Монтальва танасида иприт ва таллий излари мавжудлиги, 2013 йилдаги ўрганишлар эса зарин билан заҳарланганлик аломатларини кўрсатди.
1964—1970 йилларда мамлакатни бошқарган ва ҳарбий диктатура тузумини кескин танқид қилган Фрей Монтальва 1982 йили пойтахт Сантьягодаги касалхоналардан бирида вафот этди. Ўлимнинг расмий сабаби сифатида ўткир перитонит (қорин пардасининг яллиғланиши)га олиб келган бактериал инфекция кўрсатилди.
2009 йили олти киши, жумладан, шифокорлар ва ДИНА махфий полицияси собиқ жосусларига собиқ президентни заҳарлашда айблов эълон қилинди. 2014 йили тергов боши берк кўчага кириб қолди ва расман ёпилди. Бироқ ўтган йили Чили апелляция суди Монтальва ўлими сабабларини ўрганишни тиклаш юзасидан қарор қабул қилди.
Изоҳ (0)