Shotlandiyalik 18 yoshli Endryu MakKin Facebook’ning Shimoliy Koreyadagi kloniga “admin” logini va “password” paroli yordamida daxl qila oldi. Bu haqda “VC.ru” xabar bermoqda.
27-may kuni Motherboard nashri Shimoliy Koreyada Facebook’ni klonlashtirayotgan sayt paydo bo‘lganini ma’lum qilgandi. Bu xabar tarqalishidan bir necha soat o‘tib, MakKin saytni buzib kira oldi.
MakKinning bildirishicha, u kirgan paytda ijtimoiy tarmoq to‘liq ishlagan — unda ro‘yxatdan o‘tish, boshqalar bilan do‘stlashish va qurilma messenjer orqali muloqot qilish imkoniyati bo‘lgan.
Sayt 43 dollar turadigan phpDolphin onlayn konstruktori yordamida yasalgan — bu resurs odatda kompaniyalar ichida ijtimoiy tarmoqlar yaratishda ishlatiladi. Sayt DNS manzillari Shimoliy Koreyaga taalluqlidir.
Ekspert Dag Madorining fikricha, hozir saytni kim yaratganini aniqlash mushkuldir. Klonning manzili — “Starcon.net.kp” Janubiy Koreyaning mahalliy firmalarga sayt yaratib berish bilan shug‘ullanuvchi Starcon kompaniyasini ko‘rsatmoqda. Ammo Janubiy Koreya hududida joylashgan serverlardan loyihaga kirib bo‘lmadi, negaki Janubiy Koreya regulyatori “.kp” zonasidagi har qanday manzillarga berilgan so‘rovlarni bloklaydi.
Motherboard mutaxassislarining taxmin qilishicha, sayt KXDRning ichki tarmog‘i uchun yaratilgan bo‘lishi mumkin.
Madorining ta’kidlashicha, KXDRda bir necha yuz kishigina internetga chiqa oladi — bular asosan amaldorlardir. 2016-yil aprelida mamlakatda Facebook, YouTube va Twitter rasman bloklandi.
Izoh (0)