Chechenistondagi qishloq fuqarolari Qodirov ustidan qilingan shikoyat uchun Putindan uzr so‘radi

Chechenistonning Sharoy tumani Kenxi qishlog‘i aholisi Vladimir Putinga murojaatnoma yuborib, respublika rahbari Ramzan Qodirovning o‘z hamyurtlari Ramazon Jaloldinov tomonidan tanqid qilingani yuzasidan uzr so‘radi. Bu haqda qishloq rahbari Magomed Gajiyevga tayanib, “RBK” xabar berdi.

Uning so‘zlariga ko‘ra, Kenxida mahalliy aholi yig‘in o‘tkazib, murojaatnoma imzoladi va Putindan Jaloldinovning gaplarini Kenxi aholisining fikrlari ifodasi sifatida qabul qilmaslikni so‘radi.

Xatda Qodirovning tanqidchisini “butun umri davomida o‘z hamqishloqlari manfaatlariga zid holda yashab kelayotgan o‘qimagan odam” deb atashdi. Mualliflar fikricha, ularning “vatani dushmanlari Jaloldinovdan Rossiyaga qarshi axborot urushida o‘zlarining yaramas niyatlariga erishish uchun foydalanmoqda”.

Eslatib o‘tamiz, Rossiya prezidenti Vladimir Putinga videomurojaatida Ramzan Qodirov ustidan shikoyat qilgan Ramazon Jaloldinovning uyini yoqib yuborishgani xabar berilgan edi. Jaloldinov yomon turmush sharoitlaridan noligan edi. Bundan tashqari, u bunday muammolarga Checheniston rahbariyati e’tibor qaratmasligi haqida aytgan edi.

Keyinroq esa Ramzan Qodirov uning ustidan shikoyat qilgan fuqaroning uyi yoqib yuborilgani borasidagi xabarlar haqiqatga mos kelmasligini bildirgandi.