2016-yil 26–29-may kunlari Farg‘ona shahrida oliy o‘quv yurtlari talabalari o‘rtasida “Universiada–2016” musobaqalarning final bosqichi bo‘lib o‘tadi. Bu haqda musobaqa matbuot xizmati “Daryo” nashriga ma’lum qildi.
“Universiada–2016” musobaqalarida Toshkent shahri, Qoraqalpog‘iston Respublikasi va viloyatlardan jamoalar sportning 15 turi bo‘yicha bellashadi.
Farg‘onada bo‘lib o‘tadigan sport musobaqalarida 1068 nafar sportchi va murabbiylar, 155 nafar hakamlar hamda O‘zbekistonning mashhur sportchilari hamda ommaviy axborot vositalari xodimlari qatnashishi rejalashtirilgan. Sport musobaqalari 12 ta sport inshootlarida o‘tkaziladi.Sport musobaqalari ochilishida yoqiladigan mash’ala Parkent tumanidagi Quyosh inshooti tabiiy nur quvvati bilan yoqiladi. Universiada mash’alasining Parkentdan Farg‘ona shahrigacha keladigan yo‘l xaritasi tuzildi. Mash’ala marshruti masofasi 364,5 kilometr bo‘lib, shundan 338,5 kilometr avtomobil va 26 kilometrni sportchilar estafetasi tashkil etadi.
Universiada o‘yinlariga tayyorgarlik ko‘rish jarayoni va musobaqalar davomida uning ishini yoritib boradigan veb-sayt guruhi tashkil etilgan. Universiadaga tayyorgarlik, uning ishtirokchilari, musobaqalar o‘tadigan manzillar va boshqa ma’lumotlar www.universiada-2016.uz veb-sayti orqali tanishtirib boriladi. Musobaqa arafasida va davomida uning tezkor natijalari to‘rtta xorijiy tillarga tarjima qilinib, butun dunyoga tarqatib turiladi.
Izoh (0)