Damashq yaqinidagi qurolli to‘qnashuvlarda 300 dan ortiq jangari halok bo‘ldi

Suriya poytaxti yaqinidagi Sharqiy Guta mintaqasida turli ekstremistik guruhlar o‘rtasida qurolli to‘qnashuvlar tinmayapti. Bu haqda “TASS” xabar bermoqda.

Misrab, Jisrin, Sakba va Zamalkada ayniqsa shiddatli janglar avj olgan. Mazkur aholi punktlari ustidan nazorat uchun “Jaysh al-Islom” va ularning “Jabhat an-Nusra”, “Feylak Rahmon” va “Jaysh al-Fustat” guruhlaridagi raqiblari o‘rtasida kurash ketmoqda.

Ma’lumotlarga ko‘ra, 20 kun avval boshlangan to‘qnashuvlarda 300 dan ortiq kishi qurbon bo‘lgan. Ulardan aksariyati “Jaysh al-Islom” a’zolari ekanligi aytilmoqda. Tinch aholi o‘rtasida ham halok bo‘lgan va jarohatlanganlar bor.

Mojaroni 28-aprelda “Jaysh al-Islom” shtabi va bazalariga hujum uyushtirgan hamda 400 nafar jangarini asir olgan “Feylak Rahmon” guruhi boshlab bergani bildirilmoqda.