Namoyishchilar Chjan Detszyan boshchiligidagi Xitoy delegatsiyasi yoki politsiyachilarga uloqtirmasligi uchun Gonkong markaziy ko‘chalaridagi chorqirra toshlarning birikkan qismlari yelim bilan yopishtirib chiqildi. Bu haqda TJournal xabar bermoqda.
Mamlakatda nufuzi bo‘yicha davlat rahbari Si Szinpin va bosh vazir Li Ketsyandan so‘ng uchinchi shaxs hisoblanadigan Butunxitoy xalq vakillari kengashi raisi Chjan Detszyan 18-may, chorshanba kuni iqtisodiy konferensiyada ishtirok etadi. Shu sababli anjuman bo‘lib o‘tadigan sohilbo‘yidagi bino atrofiga joylashtirilgan chorqirra toshlar yopishtirib chiqildi.
Gonkongdagi uchrashuv oldidan boshqa xavfsizlik choralari ham ko‘rilgan. Jumladan, markaziy ko‘chalarga suv to‘ldirilgan plastikli barrikadalar va metall to‘siqlar o‘rnatilmoqda.
Chjan Detszyan Gongkongga keyingi to‘rt yil mobaynida tashrif buyurgan eng yuqori lavozimli davlat arbobi bo‘ladi. Anjumandagi ishtirokidan tashqari, uning mahalliy yetakchilar bilan ham uchrashuvlari ko‘zda tutilgan.
Izoh (0)